ئومێد باشکالى

هێرشا ل سه‌ر مالا نێچيرڤان بارزانى سه‌رۆكێ هه‌رێما كوردستانێ، نه‌رازيبوونه‌كا مه‌زن لدويڤ خۆ ئينا، پرانیيا سه‌ركردەیێن ديار یێن جيهانێ ئه‌و هێرش ب تووندى شه‌رمه‌زار كر، وێ چه‌ند ژى پێگه‌هێ نێچيرڤان بارزانى و هه‌رێما كوردستانێ ل سه‌ر ئاستێ ده‌ڤه‌رێ و جيهانێ ب نه‌يار و نه‌حه‌زێن هه‌رێما كوردستانێ نيشان دده‌ت.

هێرشا ترسنۆکانە یا درۆنى ژبۆ سەر مالا نێچیرڤان بارزانی سه‌رۆكێ هه‌رێما كوردستانێ ل باژێرێ دهۆکێ، جارەکا دی سەلماند کو نێچیرڤان بارزانی نەک هەر سەرکردەیەکێ ناڤخۆیی یە، بەلکو ستوینەکا سەرەکی يا ئارامییێ یە ل رۆژهەلاتا ناڤين. هێرشا بێ بنه‌مايا سه‌ر مالا نێچيرڤان بارزانى كارڤه‌دان و نه‌رازايبوون و شه‌رمه‌زاريیه‌كا مه‌زن ل سه‌ر ئاستێ جيهانێ لدويڤ خۆ‌ ئينا، كو د سه‌رێ رێزێ دا ویلایەتێن ئێکگرتی یێن ئەمریکا ب توندی ئەڤ کارە شەرمزار کر و ته‌كه‌زى ل سەر پاراستنا سەقامگیرییا هەرێمێ کر. هه‌ر وەسا تورکیا ژ لایێ خۆ ڤە، ئەڤ هێرشە ب کریارەکا تێکدەرانە ناڤ کر. ژلايه‌ك دى نەتەوەیێن ئێکگرتی و وەلاتێن عەرەبی و دەوروبەر، هەمییان ب ئێک دەنگ راگەهاند: کو دەستدرێژی بۆ سەر نێچیرڤان بارزانی، دەستدرێژییە بۆ سەر ئاشتییا دەڤەرێ، هه‌ڤده‌م فه‌ره‌نسا وه‌كو هه‌ر ده‌م پشته‌ڤانیيا خۆ بۆ هه‌رێما كوردستانێ نيشان دا و ب رێيا په‌يوه‌ندیيه‌كا ته‌له‌فۆنى دگه‌ل نێچيرڤان بارزانى ب تووندى هێرش شه‌رمه‌زار كر.

پرسيار ئه‌وه‌ ئه‌رێ بۆچی جیهان ل دۆر هێرشا ل سه‌ر مالا سه‌رۆكێ هه‌رێما كوردستانێ دلگرانه‌؟ ئه‌و ژى ژبه‌ر كو نێچيرڤان بارزانى خودانێ پەیاما (پێکڤەژیانێ) یە ل ده‌ڤه‌ره‌كا پڕى شه‌ڕ و ئالۆز كو ده‌رفه‌ت ب ئاشتى و ئازادیيێ ناهێته‌دان. ژناڤخۆيا هه‌ريمێ ژى نێچيرڤان بارزانى سەرکردەيه‌كێ ئاشتیخوازە کو ل هه‌رێما کوردستانێ هه‌رده‌م وەکو چەترەکێ بوويه‌ بۆ هه‌مى ئالیيێن سياسى و پێکهاته‌يێن جودا، هێرش دچن و نامینن، بەلێ پێگەهێ نێچیرڤان بارزانی د دلێ جیهانێ و ب تايبه‌تى د ناڤا دلێ گه‌لێ کورد دا دمينیت‌، پشتەڤانییا جیهانێ ژبۆ سه‌رۆكێ هه‌رێما كوردستانێ، بەرسڤەکه‌ بۆ نه‌يار و نه‌حه‌زێن گه‌لێ كورد كو کوردستان نه‌ يا ب ته‌نێ يه‌ هه‌ر ده‌م جيهانێ پشتا هه‌رێمێ يه‌.