گاڤ

تیما کوردستانی یا رێکخراوا CPT د نویترین ڕاپۆرتا خۆ دا ئاشکرا کر، د هەیاما مەها بۆری دا هەرێما کوردستانێ ب رەنگەکێ بەردەوام هاتییە ئارمانجکرن و ژبەر وان هێرشان 14 کەسان گیانێ خۆ ژدەستدایە و 93 کەسێن دی ژی بریندار بووینە.

ل گۆرەیی راپۆرتێ، هەر ژ دەستپێکرنا ئالۆزییێن دناڤبەرا ئەمریکا-ئسرائیل و ئیرانێ، سوپایێ پاسدارێن ئیرانێ و گرۆپێن چەکدار یێن گرێدایی ب وێ ڤە، دەست ب هێرشکرنا ل سەر چەندین جهێن جودا-جودا یێن هەرێمێ هاتینە کرن، ژ وان ژی کۆنسۆلخانە و بارەگایێن ئەمریکا، بارەگایێن حزبێن رۆژهەلات، وەزارەتا پێشمەرگەیی، کێلگەیێن پەترۆلێ و جهێن ئاکنجیبوونێ.

د راپۆرتێ دا هاتییە، د هەیاما مەهەکا شەڕی دا 474 هێرش هاتینە کرن، کو 179 ژ وان ژ ئالییێ سوپایێ پاسداران و 295 هێرش ژ ئالییێ گرۆپێن میلیشیا ڤە بووینە. دناڤ ڤان قوربانییان دا 19 کەس وەلاتییێن مەدەنی بوون کو هەمی بریندار بووینە.

ل دۆر دابەشبوونا هێرشان ل سەر پارێزگەهان، پارێزگەها هەولێرێ ب 370 هێرشان پشکا شێری بەرکەفتییە، پاشی سلێمانی ب 90 هێرشان، دهۆک ب 11 هێرشان و هەلەبجە ب 3 هێرشان دهێن.

راپۆرترێکخراوا CPT دیار دکەت، 359 هێرش ب رێیا فڕۆکەیێن بێ فڕۆکەڤان (درۆن) هاتینە کرن، هەروەسان 104 هێرش ب مۆشەکان و 10 هێرش ژی ب تۆپبارانێ بووینە. ئاماژە ب وێ چەندێ ژی هاتییە کرن کو نێزیکی 61%ێ ژ وان درۆن و مۆشەکان بەری بگەهنە ئارمانجا خۆ کەفتینە خوارێ یان هاتینە تێکشکاندن.

د پشکا دی یا راپۆرتێ دا هاتییە، د ڤان هێرشان دا جهێن مەدەنی و مالا سەرۆکێ هەرێما کوردستانێ ل دهۆکێ ژی هاتینە ئارمانجکرن، کو زیان ب 46 خانییان و 32 ترومبێلێن وەلاتیان کەفتینە، هەروەسان پرۆسەیا خواندنێ ل چەندین جهان هاتییە راوەستاندن.

د دویماهییا ڕاپۆرتێ دا، تیما CPT داخوازێ دکەت، ئەڤ شەڕە ب دویماهی بهێت و وەلاتییێن مەدەنی بهێنە پاراستن و قەرەبووکرن، هەروەسان داخوازێ ژ حکومەتا ئیراقێ دکەت ب رێیێن دیپلۆماسی کار بۆ راوەستاندنا ڤان هێرشان بکەت و رێکاران ل دژی ئالییێن هێرشکار بگریتە بەر.