گاڤ

د چارچووڤێ گەرا 25ێ ژ خۆلا ستێرێن ئێراقێ دا، ئەڤرۆ دێربییا بەهدینان دناڤبەرا یانەیێن دهۆک و زاخۆ دێ هێتەکرن، لێ بێی بەرهەڤبوونا پشتەڤانان.

یاریگەها نێڤدەولەتی یا فەرەنسو حەریری ل هەولێرا پایتەخت دێ مێڤاندارییا دێربیێ بەهدینان کەت یاری ل ژی دەمژمێر 5:30ێ ئێڤاری دهێتە کرن.

ل گۆرەی رێککەفتنەکا پێشتر یا ناڤبەرا هەردو یانەیان دا، ئەڤ یارییە دێ بێی ئامادەبوونا پشتەڤانان هێتە کرن، مەرەم ژ وێ کۆنترۆلکرنا رەوشێ یە و رێگریکرنە ژ دروستبوونا هەر گرژی و ئالۆزییەکێ.

ئەڤ یارییە نە بتنێ رویبرویبونەکا وەرزشی یە، بەلکو هەلگرا پەیامەکا مرۆڤی و براتییا کویرە، پشتی وان گرژییێن د یارییا چوونێ یا ئەڤ سالە دا رویدایی، کارگێری و یاریکەرێن هەردو یانەیان پەیامێن خۆشتڤی و تەباییێ بۆ هەڤدوهنارتینە.

رەوشا هەردو یانەیان د ڤی وەرزی یێ خۆلێ دا جودایە هەرچەندە ئاستێ وان وەکی پێدڤی نینە و ب دلێ پشتەڤانان نینە، لێ تا راددەیەکێ ئاستێ یانەیا زاخۆ جێهگیرترە، ژ کۆما 24 یارییان دا، ب 11 سەرکەفتنان، 7 وەکهەڤی و 6 شکەستنان، ب کۆمکرنا 40 خالان پلا حەفتێ یا رێزبەندییێ گرتییە، هێرشبەرێن زاخۆ 31 گۆل کرینە و 21 گۆل ژی ل سەر هاتینە تۆمارکرن.

یانەیا دهۆک ژی، د پلا نەهێ یا رێزبەندییێ دا دهێتە دیتن و خودانا 34 خالانە، کو د 24 یارییان دا 9 سەرکەفتن و 7 وەکهەڤی و 8 شکەستن هەنە، 27 گۆل تۆمارکرینە و 24 گۆل لێ هاتینە تۆمارکرن.

ل دۆر پێکهاتییێ هەردو یانەیان بۆ یارییا ئەڤرۆ، چەند یاریکەرێن دیار پشکدارنابن ، ئەڤە ژی دێ کارتێکرنێ ل سەر ریتما یاریێ کەت.

ل یانەیا زاخۆ شێرکۆ کەریم دێ ژبەر هنگافتنێ دێ ژ یارییێ بێ بەهربیت، لێ یانەیا دهۆک د رەوشەکا ب زەحمەت تردایە، ژبەر کو یاریکەر پیتەر گۆرگیس ژبەرکو ل گەل هەلبژارتییێ ئێراقێ د پاشکۆیێ مۆندیالێ دا چوویە مەکسیکێ بۆ یاریا ئەڤرۆ یێ بەرهەڤ نابیت، هەروەسا عەلی یاسینێ گۆلپارێزێ سەرەکی ژی ژبەر وەرگرتنا کارتا سۆر د یارییا بەرامبەر مینا دا پشکدارییێ د یاریێ دا ناکەت و سەعد ناتق، پاشەنگ عەبدوللا و حەموود مشعان ژی ژبەرهنگافتنێ دێ ژ یارییا دێربی بێ بەهربن.

د دیرۆکا رویبرویبوونا دا، دهۆک و زاخۆ ژ 2002 هەتا نوکە 27 جاران یاری ل بەرامبەری هەڤدو کرییە، ئامارێن دهۆک باشترن 8 سەرکەفتن هەنە و شیایە 25 گۆلان تۆمار بکەت.

ل بەرامبەر، زاخۆ خودانا دو سەرکەفتنان و 17 گۆلانە، د دەمەکێ دا 17 یارییێن ناڤبەرا وان ب ئەنجامێ وەکهەڤی ب دویماهی هاتینە، ئەڤ دیرۆکە نیشان ددەت کو یارییێن ناڤبەرا وان دوو تیمان دا هەردەم پربووینە ژ هەڤرکییەکا توند و ئەنجامێ وەکهەڤی پشکا شێری بەرکەفتییە.