رێدار سەلیم 

کوردستان، وەک مالا هەمیان پێدڤی ب پاراستن و قوربانیدانێ هەیە ژبەر هندێ ژ بۆ پاراستنا ئاسایش و سەقامگیرییا وێ د ڤی سەردەمێ تەکنۆلۆژیایا پێشکەفتی دا کو زانیاری و ڤیدیۆ ب ساناهی دهێنە بەلاڤکرن، رەنگە پیچەک ژ سەردەمێ بەرێ بزەحمەتر بیت لێ پێدڤییە ب هشیاری سەرەدەری بهێتە کرن، ب تایبەتی بەلاڤکرنا زانیارییان ل دۆر وان هێرشێن چەندین رۆژە ل سەر باژێر و دەڤەرێن جودا - جودا یێن هەرێما کوردستانێ دهێنەکرن.

وەک نڤیسەرێ گۆتارێ دڤان رۆژان دا من ئەز باوەرم وە ژی گەلەک ئەڤ سەرپێچی و فرۆشتان زانیارییێن بێ بەرامبەر بۆ دوژمنان دیتن لەورا من ب فەر دیت یا د دلێ خۆدا بکەمە گۆتار بەرسڤا هندەک پرسیارێن گرنگ دەربارەی ڤی بابەتی بدەم و بووچوونا خۆ ل سەر مەترسیێن ڤان کاران و گرنگییا پابەندبوونێ ب رێنمایێن حکومەتێ بەلاڤکرین، دیار بکەم.

ل دەستپێکێ ئەز دێ ژ مەترسیییا بەلاڤکرنا ڤیدیۆیێن  هێرشان بەحسکەم و بێژم بەلاڤکرنا ڤیدیۆیێن هێرشێن درۆنی یان مۆشەکی ل سەر باژێرێن جودا - جودا یێن کوردستانێ، ب تایبەتی ل دەمێ رویدان دگەرم، نە بتنێ خزمەتکرنا دوژمنانە، بەلکو زیانێن مەزن دگەهینیتە ئاسایشا نیشتمانی و ئارامییا جڤاکی.

د ڤان چەند خالان دا  دێ دیار کەم کا بۆچی ئەڤ کارە یێ مەترسییە:

یا ئێکێ ئاشکراکرنا پێگەهان بۆ دوژمنی ژبەرکو دبینم ئێک ژ مەترسیێن هەرە مەزن یێن بەلاڤکرنا ڤیدیۆیێن هێرشان ئەوە کو دوژمن دشێت مفای ژێ وەرگریت بۆ دیارکرنا جهێ کەفتنا مۆشەک یان درۆنان، ب ڤی رەنگی دوژمن دشێت ب دروستی بزانن کا ئارمانجا خۆ ئینایە یان ژی نە هەروەسا باشترکرنا هێرشێن خۆ یێن پاشتر هەلبەت ئەڤ زانیارییێن هەستیار بێ بەرامبەر ب دوژمنان دهێنە فرۆشتن.

هەروەسا دبینم تێکدانا ئارامییا دەروونی و ترساندنا خەلکی بەلاڤکرنا ڤیدیۆیێن بترس یێن هێرشان، ب تایبەتی وان هێرشان یێن کو زیانێن مادی یان گیانی ل پاشخۆدهێلن، دبیتە ئەگەرێ دروستبوونا ترس و گۆمانەکا مەزن د ناڤ خەلکی دا، ئەڤە کاریگەرییەکا نەرێنی ل سەر ئارامییا دەروونی یا جڤاکی دروستدکەت و هەستکرن ب ئێمناهییێ د ناڤ وەلاتییان دا کێم دبیت، دوژمن ژی ب ڤی رەنگی دگەهیتە ئارمانجا خۆ یا سەرەکی کو ترس و گۆمانێ د ناڤ جڤاکی دا بەلاڤ دکەت.

ئاشکراکرنا سیستەمێن بەرگرییێ و ژێرخانەیێن ئەمنی و نیشاندانا جهێ کەفتنا درۆنان یان چەوانییا بەرهنگاربوونا وان ژ ئالییێ هێزێن ئەمنی ڤە ژی ئێک ژ مەترسیێن بەلاڤکرنا وان ڤیدیۆیێن هێرشایە، ئەڤ زانیارییە دبیتە مفایەکێ مەزن بۆ دوژمنی دا کو پلانێن خۆ بۆ هێرشێن خۆ یێن پاشتر باشتر کار کار ل سەر بکەت و خالا لاواز یێن بەرگرییێ دیاربکەت.

هەرچەندە حکومەتا هەرێما کوردستانێ، ب رێکا فەرمانگەها میدیا و زانیاری ل دۆر وی بابەتی و مەترسییا وێ رێنما بۆ دەزگەهێن راگەهاندنێ و وەلاتییان بەلاڤکرینە دەربارەی چەوانییا رۆمالکرنا روودانێن ئەمنی، د ڤان رێنمایان دا ب رونی هاتییە دیارکرن کو نابیت ڤیدیۆییێن زندی یان وێنەیێن ئارستەکرنا درۆن و مۆشەکان بهێنە بەلاڤکرن، هەروەسا، رۆژنامەڤان دڤێت هشیار بن ل دەمێ بەلاڤکرنا ناڤەرۆکا ڤیدیۆ و وێنەیێن ژ ئالییێ خەلکی ڤە دهێنە هنارتن، کو نابیت وێنەیێن هەستیار و ژێرخانەیێن ئەمنی بهێنە نیشاندان لێ ب مخابنی ڤە دبینم ئەڤ رێنمایە ژ ئالییێ گەلەک دەزگەهێن راگەهاندنێ و رۆژنامەڤانان ڤە هاتینە پشتگوههاڤێتن.

ئەز گەلەک ل بەرسڤا ڤێ پسیارێ گەریام و بدەست من نەکەفت؟ پرسیار بۆچی گەلەک دەزگەهێن راگەهاندنێ و رۆژنامەڤانێن سەربەخۆ پێگیری ڤان رێنمایان نابن؟ ئەم دێ بێژین راستە گەلەک جاران رۆژنامەڤان بزاڤان دکەن بۆ ب دەستڤەئینانا (سەبقێ) د رۆژنامەڤانییێ لێ نابیت لسەر حسابا تێکدانا ئێمناهییا وەلاتی بیت و هزر د مەترسییا وی بابەتێ هەستیار دا نەهێتەکرن، ژبەر هندێ پێدڤییە ئەم هەمی بزانین کو ئاسایشا نیشتمانی و ژیانا وەلاتییان ژ هەر (سەبقەکێ)رۆژنامەڤانی گرنگترە، پێگیربوون ب ڤان رێنمایان نە بتنێ ئەرکەکێ نیشتمانییە، بەلکو پاراستنا ژیانا خەلکی و سەقامگیرییا وەلاتی ژی د ناڤ دایە، نموونەیا گرتنا چەندین کەسان ل دهۆکێ ژبەر وێنەگرتن و بەلاڤکرنا ڤیدیۆیێن هێرشێن درۆنی، بەلگەیەکە ل سەر رژدییا حکومەتێ د ڤی بابەتی دا و هۆشدارییەکە بۆ هەمییان.

پرسیارەکا دی یا گرنگ، ئەرێ کەنگی یا رەوایە مرۆڤ نهێنییێن ناڤمالا خۆ بۆ خەلکی بێژیت و ڤیدیۆ کەت؟ کوردستان وەک مالا مە هەمیانە، پاراستنا نهێنییێن وێ وەک نهێنییێن ناڤمالا هەر تاکەکێ کوردن، ئاشکراکرنا ڤان نهێنییان بۆ دوژمنی، وەک دانانا کلیلا مالا خۆیە بۆ ناڤا دەستێ دزیکەران، ئەڤە نە بتنێ خزمەتکرنا دوژمنی یە، بەلکو خیانەتە ل وەلاتی.

ئەز دێ نموونەکێ ئینم، د دەمێن شەر و ئالۆزییان دا، ئالییێن شەرکەر پترییا جاران ژمارا قوربانییان ب دروستی بەلاڤ ناکەن، بۆچی؟ ئەڤە نە ژبەر ڤەشارتنا راستییێ یە بەلکو ژبەر پاراستنا مورالا خەلکی و سەربازانە کێمکرنا ژمارا قوربانییان یان نەبەلاڤکرنا وان ب دروستی، دبیتە ئەگەر کو مورالا خەلکی بلند بمینیت و هەستێ ترسێ کێم ببیت، هەروەسا، رێگریێ ل وێ چەندێ دکەت کو دوژمن

 شانازییێ ب چ تشتان نەبەت کو و هەستێ بێهێزییێ ل دەف خەلکی دروست ببیت، هەلبەت ئەڤە ژی ستراتیژییەکا جیهانییە بۆ پاراستنا ئێمناهییا نیشتمانی و جڤاکی د دەمێن قەیرانان دا.

یا من دویماهییێ دڤێت بێژم ئەو کو کوردستان مالا مە هەمیانە و پاراستنا وێ ئەرکەکێ نیشتمانی و ئەخلاقی یە ل سەر ملێن هەمییان، بەلاڤکرنا ڤیدیۆیێن درۆنی و هێرشان، ب تایبەتی یێن کو زانیارییێن هەستیار د ناڤ دا، مەترسییێن مەزن ل سەر ئاسایشا نیشتمانی دروست دکەن و خزمەتا دوژمنان دکەن پێدڤییە هەمی دەزگەهێن راگەهاندنێ، رۆژنامەڤانێن سەربەخۆ و وەلاتی، پێگیری رێنماییێن حکومەتا هەرێما کوردستانێ ببن و ب هشیاری سەرەدەرییێ بکەن، ژبەرکو پاراستنا نهێنییێن ناڤمالا نیشتمانی و رێگریکرن ل بەلاڤکرنا زانیارییێن کو دبیت زیانێ بگەهیننە وەلاتی، ئەرکەکێ پیرۆزە و دێ بیتە ئەگەرێ پاراستنا سەقامگیری و ئاسایشا کوردستانێ.