گاڤ

ل گەل زێدەبوونا ئالۆزییێن سەربازی ل دەڤەرێ و بەردەوامییا شەڕی، ئەڤرۆ لیرەیێ تورکی نزمترین ئاستێ دیرۆکی یێ خۆ بەرانبەر دۆلارێ ئەمریکی تۆمار کر.

ئەڤ بهایێ نوی یێ دراڤێ تورکی د دەمەکی دایە کو نەخشەیێ گوهۆڕینێن بهایێ لیرەی ژ سالا 2011ێ وەرە هەتا 2026ێ، ئاماژێ ب هێلەکا نزم یا بەردەوام دکەت، لێ د چەند مەهێن بۆری دا و ژبەر شەڕێ ئیرانێ و نەجهگربوونا رێڕەوێن ئاڤی وەک دەرتەنگا هورمز، لەزاتییا دابەزینێ گەهشتییە ئاستەکێ ترسناک.

ل دویڤ داتایێن بازاڕێ جیهانی یێ دراڤی، بهایێ ئێک لیرەیێ تورکی بۆ ئاستێ 0.02243 دۆلار دابەزییە، ئەڤە ژی ب وێ واتایێ دهێت کو نرخێ ئێک دۆلارێ ئەمریکی گەهشتییە نێزیکی 44.6 لیرەیان. شارەزایێن ئابۆری ئاماژێ ب وێ یەکێ دکەن کو تێچوویێ شەڕی ل دەڤەرێ و بلندبوونا نرخێ وزە و کەلوپەلان، ب توندی بەرسنگێن ئابۆرێ تورکیا گرتینە.

دابەزینا بهایێ لیرەی ب ڤی رەنگی، بوویە ئەگەرێ بلندبوونا پیڤانکی یا رێژەیا هەلاوسانێ و گرانبوونا ژیارێ، کو ئەڤێ چەندێ فشارەکا مەزن ئێخستییە سەر حکومەتا ئەردۆغانی بۆ ڤەدیتنا چارەیەکا بلەز. ڤێ هەڕفینێ بتنێ کەرتێ دارایی ڤەنەگرتییە، بەلکو کارتێکرنەکا راستەوخۆ کرییە سەر کەرتێ پیشەسازی و هناردەکرنێ ژی، چونکی تێچوویێ هاوردەکرنا کەرەستەیێن خاڤ ب دۆلاری بۆ کارگەهان گەهشتییە ئاستەکێ خەیالی.

ئەڤ رەوشا ئابۆری یا تورکیا پەیوەندییەکا راستەوخۆ ب هەلویستێ سیاسی و سەربازی یێ وەلاتی بەرانبەر شەڕێ ئیرانێ و ئەمریکا-ئسرائیل ڤە هەیە. ژبەر کو تورکیا پشکەکا مەزن یا پێدڤییێن خۆ یێن وزەیێ ژ ئیرانێ و دەڤەرێ دابین دکەت، دائێخستنا دەرتەنگا هورمز و سزایێن ل سەر ئیرانێ کارتێکرنەکا نەرێنی ل سەر لیرەی کرییە. شارەزا هوشدارییێ ددەن کو ئەگەر ئەڤ شەڕە بەردەوام بیت، مەترسییا گرتنا پشکەکا مەزن یا ناڤەندێن ئابۆری ل تورکیا هەیە، ئەڤە ژی دێ رەوشا مرۆڤی و جڤاکی ل وێرێ بەرەڤ ئالۆزییێن مەزنتر بەت.