گاڤ

ئەلمانیا بۆ بلندکرنا شیانێن خۆ یێن بەرگریێ دژی گەفێن رووسیا، بڕیارەکا نوی دەرکر کو ل دویڤ وێ بڕیارێ گەنجێن 17 سالی هەتا 45 سالی بێی مۆلەتا سەربازی نەشێن ژ 3 مەهان پتر ل دەرڤەی وەلاتی بمینن.

ئەڤ بڕیارە د دەمەکی دایە کو ئەورۆپا د قویناغەکا هەستیار یا ئەمنی دا دەرباز دبیت و ئەلمانیا بڕیار دایە ژمارەیا سەربازێن خۆ یێن چالاک هەتا سالا 2035ێ ژ 184 هزاران بۆ پتر ژ 255 هزاران بلند بکەت.

ل دویڤ نووچەیەکێ رۆژنامەیا "Berliner Zeitung" کو ل 3ێ نیسانێ بەلاڤکرییە، ژ دەستپێکا سالا 2026ێ وەرە هەر گەنجەکێ د ناڤبەرا تەمەنێ 17 بۆ 45 سالی دا بخوازیت بۆ مەبەستا خواندنێ، کارکرنێ یان گەشتێ ژ 3 مەهان پتر ل دەرڤەی ئەلمانیا بمینیت، پێدڤییە مۆلەتا فەرمی ژ سەنتەرێن کار یێن "Bundeswehr" وەربگریت. ئەڤ سیستەمە بەری نوکە بتنێ د دەمێ شەڕی دا دهاتە بجهئینان، لێ نوکە د دەمێ ئاشتییێ دا ژی بوویە بڕیارەکا جهگر.

وەزارەتا بەرگرییا ئەلمانیا راگەهاند کو ئارمانجا سەرەکی ژ ڤێ گاڤێ ئەوە کو د دەمێ هەر قەیرانەکێ دا، تۆمارێن دروست و باوەرپێکری یێن وان کەسان ل بەر دەست بن یێن کو ئەرکێ سەربازی دکەڤیتە سەر ملێن وان. هەروەسا ئەلمانیا دەست ب راپرسییەکا نەچاری بۆ وان گەنجان کرییە یێن کو ژ سالا 2008ێ وەرە ژدایکبووین، دا کو ئاستێ بەرهەڤییا وان بۆ خزمەتا سەربازی بزانن.

شارەزایێن ئەمنی دیار دکەن کو ئەڤ بڕیارە نیشانا هندێ یە کو ئەورۆپا بەرەڤ سەردەمەکێ سەخت یێ سیاسی و سەربازی گاڤان دهاڤێژیت. ب تایبەت کو ئەلمانیا ژ ئالییێ جیوگرافی ڤە ناڤەندا لۆجستی یا ناتۆیە و هەر گەفەکا رووسیا دێ ب شێوەیەکێ راستەوخۆ مەترسیێ ل سەر پەیدا کەت.