پاکستانێ پلانا راگرتنا شەری گەهاندە دەستێ ئەمریکا و ئیرانێ
بەلاڤ بکە
گاڤ
پلانەکا پێشنیازکری یا دوێ قویناغی ئەڤرۆ گەهشتە دەستێ ئەمریکا و ئیرانێ، پێدڤییە هەردو وەلات ل سەر رازی ببن و دەرتەنگا هورمز بهێتە ڤەکرن.
ئاژانسا رویتەرز ژ ژێدەرێن هایدار راگەهاند: جەنەرال عاسم مونیر، فەرماندارێ سۆپایێ پاکستانێ دوهی هەمییێ ب تێلەفۆنێ ل گەل نوینەرێ ترەمپی و وەزیرێ دەرڤە یێ ئیرانێ ل سەر خەت بوو. پلانەکا دو قویناغ هاتییە بەرهەڤکرن و بۆ هەردو وەلاتان هاتییە هنارتن.
د پلانێ دا هاتییە: قویناغا ئێکێ ڤەکرنا دەرتەنگا هورمزە ل گەل راگرتنا شەرێ و پێدڤییە هەردو وەلات ئەڤرۆ رازیبوونێ ل سەر بدەن. د ناڤبەرا 15 بۆ 20 رۆژان دا پێدڤییە هەردو وەلات ل ئیسلام ئەباد کۆمببن و خالێن رێککەفتنا دویماهییێ ئیمزا بکەن. مەرجێن رێککەفتنێ ژی دویماهیکئینانا بەرنامەیێ ئەتۆمی یێ ئیرانێ یە ل گەل راکرنا پشکەکا مەزن یا سزایان ل سەر ئیرانێ.
بەرپرسەکێ بلند یێ ئیرانێ ژی بۆ رویتەرزێ گۆت: نوکە ئەو پێداچوونێ د پلانا نوی دا دکەن، لێ ئیران ب ژڤان و فشاران رازی نابیت. دەرتەنگا هورمز ب رێککەفتنا دەمکی ناهێتە ڤەکرن، ژ بەرکو ئەمریکا یا بەرهەڤ نینە رێککەفتنا هەردەمی یا راگرتنا شەرێ ئیمزا بکەت.
