گاڤ

ژێدەرێن رۆژنامەڤانی ل ئسپانیا ئاشکرا کرییە، یانەیا پاریس سان جێرمان یا فڕەنسی، گۆرزەکێ دی ل یانەیا بەرشەلۆنا دا، ب رێیا گرێبەستکرن ل گەل یاریکەرەکێ لاو و خودانبەهرە کو هەیامەکا درێژە بزاڤێن بدەستڤەئینانا وی دکەت.

ئەو یاریکەرێ هەمی کێشە ل سەر "ئەبوبەکر مایگا"یە، یاریکەرێ هێلا ناڤین یێ هێرشبەر کو ژییێ وی 16 سالن و خەلکێ وەلاتێ مالی یە. هەیامەکە مایگا ل ژێر چاڤدێرییا هویر یا یانەیا بەرشەلۆنا دایە.

میدیایێن ئسپانیا دیار کرییە، ئەڤ یاریکەرێ بلەز، ب رێیا پشکدارییا وی ل گەل هەلبژارتیێ وەلاتێ خۆ یێ تەمەنێن جودا-جودا سەرنجا هەمییان راکێشایە، نوکە گەلەک نێزیکی پاریس سان جێرمان بوویە، د دەمەکی دا بەرشەلۆنا بزاڤێن مەزن بۆ ئیمزاکرنا وی کرینە.

بزاڤێن بەرشەلۆنا بۆ گرێبەستکرن ل گەل ئەبوبەکری بۆ سالا بۆری ڤەدگەڕن، دەما کو بۆ هەیاما درێژ پشکداری د مەشق و راهێنانێن یانەیا کەتەلۆنی دا کری و ئاستەکێ بلند نیشان دایی، بەری کو بزڤریتە وەلاتێ خۆ و چاڤەرێ بکەت هەتا ژییێ وی بگەهیتە ئاستێ یاسایی بۆ ڤەگوهاستنا فەرمی بۆ ئەکادیمییا یانەیێ.

ژێدەر دبێژن، پاریس سان جێرمان ب بێدەنگی مفا ژ سستی و خەمسارییا بەرشەلۆنا وەرگرت و هاتە ناڤ مژارێ دا. یانەیا فڕەنسی ئەو لاوە برە ئەکادیمییا خۆ و مەشقێن جودا پێ کرن. تشتێ پتر بەرشەلۆنا دلگران کری ئەوە کو وی یاریکەرە ل گەل پاریسێ پشکداری د جاما "ئۆلیمپیایا پاشەرۆژێ دا" دا کرییە کو ل ئەکادیمییا ئەیاکس یا هۆلەندی هاتبوو برێڤەبرن، ئەڤە ژی ب مەرەما پشتراستبوون ژ شیانێن وی.

رۆژنامەیا "سپۆرت" یا نێزیکی بەرشەلۆنا دبێژیت: ئەڤ پشکداریکرن و مەشقێن ل گەل پاریسێ نیشان ددەن کو یانەیا فڕەنسی رێکێ بۆ وی خۆش دکەت دا کو ب فەرمی گرێبەستێ ل گەل وی لاوی بکەت بەری ژییێ وی ببیتە 18 سالی.

رۆژنامەیا ئسپانی زێدەتر دبێژیت: گرێبەستکرن ل گەل ڤی یاریکەرێ دێ هەڤرکییا دژوار یا دناڤبەرا بەرشەلۆنا و پاریسێ بهێزتر کەت و بەرپرسێن بەرشەلۆنا ب چو رەنگان ب ساناهی قەبویل ناکەن کو ڤی یاریکەرێ خودان بەهرە ژدەستب دەن.