گاڤ

سەرۆکێ ئەمریکا راگەهاند: "ئەز ژ هندەک کەسێن دیارکری یێ تۆرە مە، چونکی وان دەست ب سەر وان چەکان دا گرت یێن مە بۆ خۆنیشاندەرێن ئیرانێ فرێکرین." هەروەسان گۆت ژی: ئەو کەس دێ باجەکا مەزن ل سەر وی کاری دەن.

دوهی ئێکشەمبییێ ترەمپی بۆ کەنالێ (فۆکس نیوز) دیار کربوو، وان ب رێکا "کوردان" چەک بۆ خۆنیشاندەرێن ئیرانێ فرێکرییە، لێ کوردان دەست ب سەر دا گرتییە و ل نک خۆ هێلایە.

دوشەمبییێ 6ێ نیسانا 2026ێ، دۆنالد ترەمپ ب رەنگەکێ ئێکسەر ل ئاهەنگا جەژنا ئیستەر (قیامە یا کریستیانان) ل ناڤ باخچەیێ کۆچکا سپی بۆ رۆژنامەڤانان راگەهاند، "مە هندەک چەک فرێکرن، بڕیار بوو بگەهنە دەستێ خەلکی [خۆنیشاندەرێن ئیرانێ] دا کو بشێن دژی ڤان چەتەیان [حکومەتا ئیرانێ] شەڕی بکەن. لێ ئەو کەسێن مە چەک بۆ فرێکرین بۆ خۆ هەلگرت. ئەز ژ گرۆپەکێ دیارکری یێ خەلکی تۆرە مە و دێ باجەکا گران بۆ ڤی کاری دەن."

حزبێن رۆژهەلاتێ کوردستانێ بەرسڤا دۆنالد ترەمپی دا و راگەهاندن، چو جۆرە چەک یان هاریکارییێن سەربازی ژ ئەمریکا وەرنەگرتینە و ئەو چەکێن ل بەر دەستێ وان هەین "د کەڤنن و یێن سەردەمێن پێشترن".

کاکۆ عەلیار، ئەندامێ دەفتەرا سیاسی یا کۆمەلەیا شۆرەشگێر یا زەحمەتکێشێن کوردستانا ئیرانێ گۆت: "وەک حزبا مە، چو چەک بۆ مە نەهاتینە و مە وەرنەگرتینە، تەنانەت ئەم ئاگەهداری بابەتێ ژی نینین و کەسێ د ڤی واری دا ئاخفتن دگەل مە نەکرییە."

محەمەد نەزیف قادری، بەرپرسێ پەیوەندییێن (حدکا) ژی گۆت: "سیاسەتا مە نە ئەوە کو ب توندوتیژی خۆنییشاندانان بکەین، ئەم دخوازین ب رێیا ئاشتییانە داخوازییێن خۆ بکەین. ئەو ئاخڤتن بێ-بنەمانە، ئەو چەکێن مە هەین یێن بەری 47 سالانە کو د مەیدانێن شەڕی دا مە وەک دەستکەفت بدەستڤەئیناینە."

هەروەسان ئەمجەد حوسێن پەناهی، بەرپرسێ پەیوەندییێن کۆمەلەیا زەحمەتکێشێن کوردستانێ ل هەولێرێ گۆت: "ئەو چەکێن مە هەین یێن بەری 30 بۆ 40 سالانە. هەوە پشتراست دکەین ئێک فیشەک ژی ژ چو وەلاتان وەرنەگرتییە."

سروە ناسری، نوینەرا رێکخراوا کوردستانا حزبا کۆمۆنیستا ئیرانێ (کۆمەلە) ژی راگەهاند: "حزبا مە نە ئێک فیشەک و نە ئێک دینار بۆ شەڕێ ئەمریکا و ئسرائیل دژی ئیرانێ وەرنەگرتییە و چو ئاخفتن ژی د ڤی واری دا ل گەل وان وەلاتان نەکرینە."

هامنۆ نەقشبەندی، ئەندامێ فەرماندەییا گشتی یا سوپایێ میللی یێ کوردستانێ یێ سەر ب پارتی ئازادی کوردستان (PAK) ژی گۆت: "پەیامەکا نەزەلالە، مە چو چەک ژ چو وەلاتان وەرنەگرتینە، چەکێن مە یێن سەردەمێ شەڕێ پارتیزانی و شەڕێ داعشێ نە."