گاڤ

دۆنالد ترەمپ سەرۆکێ ئەمریکا د کۆنفرانسەکێ رۆژنامەڤانی دا ل واشنتۆن چەندین پەیامێن گرنگ دەربارەیی کوردان و ئۆپەراسیۆنەکا نهێنی ل ناڤ ئاخا ئیرانێ ئاشکرا کرن.

ترەمپی ب رۆهنی راگەهاند کو ئەو ب باشتر دبینیت کورد خۆ تێکهەلی شەڕێن نوکە یێن دەڤەرێ نەکەن. ترەمپی گۆت: "ب دیتنا من یا باشترە کورد دویر بکەڤن، چونکی تێکهەلبوونا وان دێ هندەک کێشە و ئالۆزییان بۆ وان دروست کەت. ئەز نابێژم دێ بنە ئەگەرێ مرنێ، مەرەما من پاراستنا وانایە، لەوما دیسا دبێژمەڤە: یا باشتر ئەوە ئەو خۆ دویر بئێخن."

د هەمان دەم دا، ترەمپی ب گەشبینی بەحس ل پەیوەندییێن ئەمریکا و کوردان کر و گۆت: "مە پەیوەندییەکا دیرۆکی و دێرین ل گەل کوردان هەیە."

د پشکەکا دی دا ترەمپی پەردە ل سەر ئۆپەراسیۆنەکا سەربازی یا ئالۆز ل ناڤ ئاخا ئیرانێ لادا. وی راگەهاند کو ئەمریکا 200 زەلامێن شارەزا و تایبەت تنێ بۆ رزگارکرنا ئێک فرۆکەڤانێ ئەمریکی هنارتبوون. ترەمپی گۆت: "گەلەک یا ب زەحمەتە تو بشێی ل ناڤ وەلاتەکێ وەک ئیرانێ سەربازەکێ خۆ رزگار بکەیی، بەلێ ئەڤە تنێ د شیانێن ئەمریکا دا یە و مە برێڤە بر."

جۆن راتکلیف بەرپرسێCIA)) پشتراست کر، هەوالگیرییا ئەمریکا ب هەیری جهێ فرۆکەڤانی دیتبوو و شیان ب سلامەتی وی بگەهیننە ئەمریکا.

پیت هێگسس وەزیرێ شەڕی ئەڤ کریارە ب "موعجیزە" وەسف کر و ئاشکرا کر، فرۆکەڤان د ناڤ "شکەفتەکێ" دا هاتبوو ڤەشارتن. وی گۆت: "هەر کەسەکێ ڤیابا نێزیکی وی ببیت، دا ئاگری ژ ئەسمانی ب سەر دا بارینین."

جەنەرال دان کەین سوپاسالارێ ئەمریکا تەکەزی ل وێ یەکێ کر، ئارمانجا سەرەکی یا سوپایی ئەوە هەردو فرۆکەڤان ب سلامەتی بزڤرنە مالێن خۆ ڤە.