گاڤ

ساخلەمییا دهۆکێ ب پشتبەستن ب هژمارەکا رێنماییێن وەزارەتا ساخلەمییێ هندەک بریارێن نوی دەرکرن و راگەهاند، چارەسەرکرن ب تەلەفۆن و واتسئاپی قەدەغەیە.

دوشەمبییێ 6ێ نیسانا 2026ێ، رێڤەبەرییا گشتی یا ساخلەمییا پارێزگەها دهۆکێ، ب پشتبەستن ب نڤیسارەکێ کو هژمارەکا رێنماییێن وەزارەتا ساخلەمییێ تێدانە هاتینە بەلاڤکرن و ئیمزایا د. سامان بەرزنجی، وەزیرێ ساخلەمییێ ل سەرە، چەند بریارەکێن نوی ل دۆر نۆبەدارییا نۆشداران ل نەخۆشخانەیان دەرکرن.

ل گۆرەیی رێنماییان، ئەڤ بریارە ژ پێخەمەت بەرژەوەندییا گشتی و پاراستنا مافێن نەخۆشان هاتینە دان و دێ ب ڤی رەنگی بن:

پێدڤییە رێڤەبەرێن نەخۆشخانەیان و پشکێن وان، لیست و خشتەیێ مەهانە یێ نۆبەدارییێ ب فەرمانەکا کارگێری دەربئێخن. ئەڤ خشتەیە ژی پێدڤییە برەنگەکێ دادپەروەرانە و بێ-جوداهی دناڤبەرا کەسان دا بهێتە دابەشکرن.

ل دەما هەر گوهۆرینەکا د خشتەیی دا، پێدڤییە زویتر رێڤەبەرییا نەخۆشخانەیێ و سەرۆکێ پشکێ و سەرۆکێ نۆشداران لێ ئاگەهدار بن و رەزامەندییێ ل سەر بدەن.

پێدڤییە نۆشدارێ پسپۆرێ نشتەگەرییان و نۆشدارێ نیشتەجێ یێ دێرین د دەمێ نۆبەدارییا خۆ دا ب جەستەیی دناڤ نەخۆشخانەیێ دا بەرهەڤ بن، ب چو رەنگان نابیت ب رەنگێ (On Call) یان ل دەرڤەیی نەخۆشخانەیێ بن.

نابیت نۆشدارێ پسپۆر و نۆشدارێ نیشتەجێ یێ دێرین ل کلینیکێن خۆ یێن تایبەت، یان سەنتەر و نەخۆشخانەیێن کەرتی تایبەت بن د وێ دەمژمێرێ دا کو ئەرکێ وان یێ نۆبەدارییێ یە.

بکارئینانا ئامیرەیێن وێنەگرتن و ڤیدیۆکرنا نەخۆشان و بەلاڤکرنا وان ل سەر موبایل، ڤایبەر، واتسئاپ و هەر ئامرازەکێ دی یێ پەیوەندییێ ب هەمی رەنگان قەدەغەیە. پێدڤییە نەخۆش ب رەنگەکێ ئێکسەر ژ ئالییێ نۆشدارێ پسپۆر ڤە بهێتە پشکنین و نۆشدار ل سەر سەرێ وی بەرهەڤ بیت.

نۆشدارێ نیشتەجێ یێ خۆلاو و یێ دێرین نابیت تێبینی و راسپاردەیێن نۆشداری ب رێیا تەلەفۆنێ ژ نۆشدارێ پسپۆر وەربگریت، بەلکو پێدڤییە نۆشدارێ پسپۆر ب خۆ ل نک نەخۆشی بەرهەڤ بیت بۆ دانا هەر بریارەکا نۆشداری.