گاڤ

سەرۆکێ ئەمریکا دۆنالد ترەمپ راگەهاند، ل سەر بنەمایێ ناڤبەینکارییا وەلاتێ پاکستانێ رازی بوویە هێرشێن سەربازی بۆ سەر ئیرانێ بۆ هەیاما 14 رۆژان رابوەستینیت.

ئەڤ بڕیارا دۆنالد ترەمپی بتنێ چەند دەمژمێران بەری ب دویماهیهاتنا وێ مۆلەتێ هات، کو تێدا گەفێن وێرانکرنا هەمی وێستگەهێن کارەبێ و پرێن ئیرانێ کربوون.

چارشەمبییێ 8ێ نیسانا 2026ێ، سەرۆکێ ئەمریکا دیار کر ئەڤ ئاگربەستە دێ "دو قۆلی" بیت، ب مەرجەکی کو ئیران رازی ببیت دەرتەنگا هورمز ب "تەمامب، ئێکسەر و بێ-مەترسی" ل هەمبەر کەشتیڤانییا جیهانی ڤەکەت.

ترەمپی د پەیاما خۆ دا گۆت: "ل سەر داخوازا شەهباز شەریف، سەرۆکوەزیران و عاسم مونیر، فەرماندەیێ سوپایێ پاکستانێ، من بریار دا ئەو هێزا وێرانکەر یا کو بریار بوو ئەڤ شەڤە بەرەڤ ئیرانێ ب رێ بکەڤیت، راوەستینم."

سەرۆکێ ئەمریکا تەکەزی ل وێ یەکێ کر، سوپایێ وەلاتێ وی هەمی ئارمانجێن خۆ یێن سەربازی بدەسڤەئیناینە و گۆت: "ئەم نوکە ل قویناغەکا گەلەک پێشکەفتی نە بۆ گەهشتن ب رێککەفتنەکا دویماهیبێ دەربارەیی ئاشتییا دەم-درێژ ل گەل ئیرانێ و رۆژهەلاتا ناڤین."

هەروەسان ترەمپی ئاشکرا کر، واشنتۆنێ پێشنیازەکا 10 خالی ژ تەهرانێ وەرگرتییە و گۆت: "ئەم باوەر دکەین دشیاندایە دانوستاندن ل سەر ڤی بنەمایی بهێنە کرن. ب نێزیکی هەمی خالێن ناکۆکییان چارەبووینە و ئەڤ دو حەفتییێن ئاگربەستێ بۆ وێ یەکێ نە دا کو رێککەفتن ب فەرمی ب دویماهی بهێت."

ژ ئالییێ خۆڤە، عەباس عێراقچی وەزیرێ دەرڤە یێ ئیرانێ راگەهاند، ئەگەر هێرشێن ل سەر ئیرانێ بهێنە راوەستاندن، هێزێن مە دێ هێرشێن خۆ راوەستینن.

ئەو ژی دیارکر، هەیاما دو حەفتییان دێ هاتنوچوونا ب سلامەتی د دەرتەنگا هورمز دا ب هەماهەنگی ل گەل هێزێن مە هەبیت.