گاڤ

وەزیرێ خواندنا بلند یا حکومەتا هەرێما کوردستانێ دبێژیت، ژ بەر هەبوونا ئاگربەستێ و ئارامییا رەوشی، بڕیارە ئەڤ شەڤە ل دۆر چارەنڤیسێ خواندنێ ل گەل ژوورا ئۆپەراسیۆنان یا حکومەتێ کۆمببن.

ئێکشەمبییێ 29ێ ئادارا ئەڤ سالە، حکومەتا هەرێما کوردستانێ بریار دا خواندنا ئامادەبوونێ د ناڤ پۆلان دا بهێتە راگرتن و پرۆسە بتنێ ب شێوازێ ئۆنلاین و دیجیتالی بەردەوام بیت.

چارشەمبییێ 8ـێ نیسانا 2026ێ، ئارام محەممەد، وەزیرێ خواندنا بلند و ڤەکۆلینێن زانستی یا حکومەتا هەرێما کوردستانێ رگەهاند: "سوپاس بۆ خودێ بۆ دەمێ دو حەفتیان دێ ئاگربەستەک هەبیت؛ پێشتر بڕیار هاتبوو دان خواندن ببیتە ئۆنلاین ل سەر بریارا ژوورا ئۆپەراسیۆنان یا حکومەتا هەرێما کوردستانێ، لێ ئەوا نوکە ئەم دبینین رەوش ئارامە و دەرفەتەکا گونجایی بۆ زڤرینا قوتابییان هەیە."

وەزیرێ خواندنا بلند و ڤەکۆلینێن زانستی یا حکومەتا هەرێما کوردستانێ گۆت: "بریارە ئەڤ شەڤە ل گەل ئالییێن پەیوەندیدار و ژوورا ئۆپەراسیۆنان یا حکومەتێ کۆمببین بۆ وێ یەکێ بریارەکا دروست ل دۆر چارەنڤیسێ خواندنێ بهێتە دان."

ب گۆتنا وەزیرێ خواندنا بلند، کۆمبوون د دەستێ ژوورا ئۆپەراسیۆنان دا یە و ئەگەر هەیە د چەند دەمژمێرێن بهێت ژی دا کۆمبوون بهێتە کرن.

ل دۆر رەوشا ئەمنی و کارتێکرنێن وێ ل سەر پرۆسەیا خواندنێ، دکتۆر ئارام محەممەد گۆت: "ل هەرێما کوردستانێ بتنێ بابەت ئاگربەستا دناڤبەرا ئەمریکا و ئیرانێ دا نینە، بەلکو ئەو گرۆپێن ل ئیراقێ هەیین گەلەک جاران گەفان ل مە دکەن و مەترسی ژ وێرێ بۆ مە دهێن. لەوما دڤێت وێ یەکێ ل بەرچاڤ بگرین کا ئەرێ ئەگەر ئەمریکا و ئیران مۆشەکان نەهێلن، ئەو گرۆپە دێ چ کەن."

وەزیرێ خواندنا بلند گەشبینییا خۆ نیشان دا و تەکەز کر: "ئەگەر رەوش ب ئارامی بمینیت، ب دیتنا من باشترە ئەم بزڤرینەڤە ناڤ کەمپێن خواندنێ و ئەو وەک وەزارەت دخوازین مفایی ژ ڤێ رەوشێ وەربگرین، ب گەشبینی ڤە تەماشەیی پاشەرۆژێ دکەین."