گاڤ

مالپەرەکێ ئەمریکی بەلاڤکر: ل بەرامبەر ئازادکرنا رۆژنامەڤانا ئەمریکی 16 چەکدارێن حزبوللا هاتینە ئازادکرن

مالپەرێ حورە یێ ئەمریکی د راپۆرتەکێ دا ئاشکرا کریە: ل بەرامبەر ئازادکرنا شێلی کیتلسۆن رۆژنامەڤانا ئەمریکی 16 ئەندامێن کەتیبەیێن حزبوللا هاتینە ئازادکرن، چەکدارێن هاتینە ئازادکرن پێشتر هێرشی هێزێن ئەمریکی ل ئیراقێ کربوون.

وی مالپەری پشتبەستن ب دو ژێدەران کرییە ئێک ل ناڤا حەشدا شەعبی کو گۆتییە شازدە چەکدارن ئێکێ دی ژ نێزیک حکومەتا ئیراقێ  کو گۆتییە حکومەتا شەش چەکدار ئازادکرینە.

دایە زانین ژی: ئەو چەکدارێن هاتینە ئازادکرن تۆمەتباربوون کو دەست هەبوو د ئارمانجکرنا بەرژەوەندیێن ئەمریکا ل ئیراق و دەڤەرێ.

کەنگی ئەو رۆژنامەڤانا ئەرمریکی هاتبوو گرتن و ئازادکرن؟

شێلی کیتلسۆن ل 31ی ئادارا 2026ێ ل ناڤەندا باژێرێ بەغدا ژ ئالییێ گروپەکێ چەکدار ڤە هاتە رەڤاندن، دهێتە گۆتن سەر ب کەتائیبێن حزبوللا ڤە بوون.

پشتی نێزیکی حەفتییەکێ ژ رەڤاندنێ، ل رۆژا سێشەمبێ 7ێ نیسانا 2026ێ هاتە ئازادکرن، راپۆرت دیار دکەن کو ئازادکرنا وێ ب هەماهەنگی د ناڤبەرا حکومەتا ئیراقێ و ئالییێن پەیوەندیدار دا بوویە، ب مەرجێ کو ئێکسەر ئیراقێ بجهـ بهێلیت.