گاڤ

وەزارەتا ساخلەمییێ یا حکومەتا هەرێما کوردستانێ د نڤیسارەکا فەرمی دا کو ژ ئالییێ د. سامان بەرزنجی، وەزیرێ ساخلەمیێ ڤە ئاراستەیی هەمی دەرمانخانەیان هاتییە کرن، چەندین رێنماییێن نوی و توند بۆ رێکخستنا کارێ وان دیارکرن.

ل گۆرەیی نڤیسارێ، "ئارمانجا سەرەکی یا ڤان رێنماییان بلندکرنا ئاستێ ساخلەمییێ و پاراستنا گیانێ وەلاتییانە، ب تایبەتی پشتی چەندین رویدانێن نەخۆش د هەیاما دەربازبووی یدا چێبووین و بووینە ئەگەرێ گیانژدەستدان و پەککەفتنا هندەک وەلاتییان ژ ئەگەرێ بکارئینانا شاش یا دەرمانی."

خالێن سەرەکی یێن رێنمایان ئەڤەنە:

●  بەرهەڤبوونا دەرمانسازی: پێدڤییە دەرمانسازێ بەرپرس ژ دەستپێکا دەوامی هەتا گرتنا دەرمانخانەیێ ل سەر کارێ خۆ یێ بەرهەڤ بیت و نابیت جهێ خۆ بۆ کەسێن نەشارەزا بهێلیت.

● فرۆشتنا دەرمانی: بتنێ دەرمانساز و ئەندامێ سەندیکا دەرمانسازان، ماف هەیە دەرمانی بفرۆشیتە وەلاتییان و نابیت کرێکار یان هاریکارێ وی ڤی کاری بکەن.

● راچێتا پزیشکی: ئەو دەرمانێن پێدڤی ب راچێتا نۆشداری هەیی، ب چو رەنگان نابیت بێی وێ راچێتێ بهێنە فرۆشتن.

● قەدەغەکرنا کارێن پەرستاری: ب توندی هاتییە قەدەغەکرن د ناڤ دەرمانخانەیێ دا دەرزی ل وەلاتییان بهێنە دان یان کانیولە بۆ بهێنە هەلاویستن، چونکی ئەڤە کارێ کلینیک و بنگەهێن ساخلەمییێ یە.

● قەدەغەکرنا کارێ نۆشداری: نابیت دەرمانساز نەخۆشییێ دەستنیشان بکەت یان پشکنینێن تاقیگەهێ بۆ وەلاتییان بنڤیسیت.

● کڕینا دەرمانی: پێدڤییە دەرمانخانە دەرمانێن خۆ بتنێ ژ کۆمپانی و کۆگەهێن فەرمی و باوەرپێکری بدەستڤەبئینن و پشتراست بن کو ب رێکێن دروست و دناڤا ساردکەران دا هاتینە ڤەگوهاستن.

وەزارەتا ساخلەمییێ هەروەسان هەمی دەرمانخانەیان ئاگەهدار دکەت، "ئەڤ رێنماییە بۆ رێکخستنا کارێ وانە و هەر جهەکێ پێگیرییێ پێ نەکەت، دێ تووشی سزایێن یاسایی بیت.