گاڤ

نەخۆشخانەیا ئۆمێد یا چارەسەرکرنا نەخۆشییێن پەنجەشێرێ ل دهۆکێ، مزگینییەکا خۆش رادگەهینیت و دیاردکەت، ئێدی ئێک ژ کێشەیێن هەرە مەزن یێن وەرگرتنا چارەسەرییا کیمیایی (کیمۆتراپی) کو ئەو ژی وەریانا پرچێ یە، بەرەڤ چارەسەربوونێ دچیت.

ل گۆرەیی بەیانەکا نەخۆشخانەیێ، ئامیرەکێ پێشکەفتی یێ ئەلمانی ب ناڤێ (Hilotherm ChemoCare - CIA) هاتیە دابینکرن، کو کارێ وی کێمکرنا کاریگەرییێن نەرێنی یێن دەرمانێن کیمیایی یە ل سەر نەخۆشان.

ئەڤ ئامیرە ب رێیا تەکنەلۆژیا "سارکرنا سەری" (Scalp Cooling) کار دکەت؛ ب ڤی ڕەنگی کو ل دەمێ وەرگرتنا ژەما کیمیایی، ناهێلیت دەرمان ب رێژەیەکا مەزن بگەهیتە رهێن پرچێ. ئەڤ چەندە دبیتە ئەگەرێ هندێ یان پرچ ب چ رەنگەکی نەوەریت، یان ژی کاریگەرییا دەرمانی ل سەر پرچێ گەلەک کێم بیت.

نەخۆشخانەیا ئومێد ئاماژە ب وێ چەندێ کر، ئارمانجا وان ژ دابینکرنا ڤێ تەکنەلۆژیا نوی، پاراستنا جوانی و سلامەتییا دەروونی یا نەخۆشێن پەنجەشێرێ یە، دا کو د قویناغا چارەسەرییێ دا ب مۆرالەکا بلندتر بەردەوام بن.

وەرینا پرچێ و چارەسەریا کیمیایی:

دەرمانێن کیمیایی (Chemotherapy) بۆ هندێ هاتینە چێکرن کو ئەو خانەیێن بلەز گەشە دکەن (وەک خانەیێن پەنجەشێرێ) ژ ناڤ ببەن. لێ ژبەر کو خانەیێن رهێن پرچێ ژی بلەز گەشە دکەن، دەرمانێن کیمیایی هێرشی وان ژی دکەن، ئەڤە ژی دبیتە ئەگەرێ وەرینا پرچا نەخۆشی د دەمەکێ کورت دا.