ته‌نیا كوردى

سەرۆک نێچیرڤان بارزانی، سەرۆکێ هەرێما کوردستانێ، ل کۆڕبەندێ ئه‌نتالیا جارەکا دی دپلۆماسییا بهێز و پێگەهێ ستراتیژییێ هەرێما کوردستانێ د ڤی دەمێ پڕ ئالۆز یێ ڕۆژهەلاتا ناڤین دا دا دیاركرن. د جیهانا سیاسەتێ دا، ئەگەر چ ڕاستە جوگرافیا چارەنڤیسە، لێ پەیڕەوکرنا دپلۆماسییەکێ ب ڤێ کویراتییێ، کارتێکرنەکا وەسا ل سەر ڤێ جوگرافیا نەجێگیر هەبوویە بوویە کلیلەک بۆ مسۆگەرکرنا پاشەرۆژەکا گه‌ش بۆ پێگەهێ هەرێمێ.

د ڤی تەوقیتی دا کو دەنگێ شەڕی یێ بلندە، د دیدارێن سەرۆکێ هەرێما کوردستانێ دا و ل سەر مێزا گەنگەشه‌یێ دگەل سەرۆککۆمارێ تورکیا و سەرکردەیێن دی، هەر دەم هه‌ست ب ئارامییەکێ دهێتە كرن؛ ئەڤە ژی ژ وێ نێرینگه‌هێ کو د دەڤەرەکێ دا زمانی چەکی یێ زال بیت، بتنێ دەنگێ ژیرانە دشێت ڕێکا پاشەرۆژێ روون بکەت. ئەڤڕۆ ئەو دەنگێ ژیر و دپلۆماسییا بهێز بانگى هه‌موویان دكه‌ت: ئەم نە پشكه‌كین ژ شەڕی، بەلکو ئەم پشكه‌كین ژ چارەسەریییێ.

سەرۆکێ هەرێما کوردستانێ ب وێ ئارامى و دیتنا ستراتیژی یا هەی، نیشا دەڤەرێ دا، هەولێر بتنێ پایتەختێ هەرێمێ نینە، بەلکو ناڤەندەکا ستراتیژییا هه‌ڤسه‌نگه‌ بۆ سفرکرنا ئالۆزییان، کو گەلەک بزاڤ هاتنه‌ كرن هەرێمێ بکێشنە ناڤ شەڕەکێ، لێ ئەڤێ ڕووینەدا. هەر ئەڤە ژی بوو وه‌كر سەرۆککۆمارێ تورکیا سوپاسییا سەرۆکێ هەرێمێ بکەت کو نەهێلا هەرێم ببیتە پشكه‌ك ژ ئاگرێ دەڤەرێ، هەروەکی دهێتە گۆتن "نایابترین هونەر ئەوە تو بشێی د ناڤ باهۆزێ دا، کەنارەکێ ئارام ببینی." سەرۆک نێچیرڤان بارزانی ل ئه‌نتالیا دروست ئەڤ هونەرە نیشان دا مادەم هه‌رده‌م شەڕ لسەر مێزا گەنگەشه‌یێ ب دوماهی دهێن، کەواتە بۆچی هەر ژ وێرێ دەست پێ نەهێتە کرن بۆ ئاشتی و باوه‌رییێ.

ئەڤ دیدگه‌ها نێچیرڤان بارزانی، نە بتنێ ده‌ربڕینێ  ژ بەرژەوەندییا هەرێمێ دکەت، بەلکو تورکیا ژی بەرەڤ رژدییا پتر ل سەر ئاشتییا ناڤخۆیی هان ددەت.

بزاڤێن سەرۆک نێچیرڤان بارزانی ل دەڤ دیرۆكنڤیسان دێ ب وی ره‌نگى مینن کو د دەمێ قەیرانان دا، سەرکردەیێ ڕاستەقینە ئەو کەسە یێ "زمانێ گه‌فان بگوهۆڕیت بۆ زمانێ هەڤپشک." لێکتێگەهشتنا بهێز یا دناڤبەرا سەرۆکێ هەرێمێ و سەرۆککۆمارێ تورکیا دا و هەڤڕابوونا وان ل سەر ئاشتییێ، ئەنجامێ جێگیرکرنا باوه‌رییه‌كا مەزنە کو دسەلمینیت هەردو ئالییان بۆ سەقامگیری و باوه‌ریێ و بهێزکرنا پتر یا پەیوەندییان وەک هەولێر و ئەنقەرە، پێدڤی ب ئێکودوو هەیە.

دیدارێن سەرۆکێ هەرێما کوردستانێ وێ ڕاستیێ بۆ مە نیشان دده‌ن "هێز نە د قێڕاندنێ دایە، بەلکو د وێ حکمەتێ دایە کو نەیاری بکەیە هەڤپشک." ئەڤە ڕێک ئەو دپلۆماسییا مۆدێرنە کو هەرێما کوردستانێ وەک یاریزانەکێ سەرەکی و هەرده‌مى د گۆڕەپانا نێڤدەولەتی دا هێلایە.