گاڤ

سوپایێ پاسدارێن ئیرانێ دبێژیت، ئەو نووچەیێن ل دۆر گەڕا دویێ یا دانوستاندنێن ئیسلامئاباد هاتینە بەلاڤکرن، د راست نینن. هەروەسان دبێژیت: "قۆرخکارییا ئەمریکا و بەردەوامییا دۆرپێچا دەریایی ل هەمبەری پێشڤەچوونا دانوستاندنان رێگرن."

ئەڤ هەلویستێ سوپایێ پاسداران پشتی وێ چەندێ دهێت، گەڕا ئێکێ یا دانوستاندنان ل پاکستانێ ژبەر ناکۆکییان ل سەر پرسا ئەتۆمی راوەستیابوو.

ئێکشەمبییێ 19ێ نیسانا 2026ێ، د بەیانەکێ دا سوپایێ پاسداران ئاماژە ب وێ چەندێ کرییە، داخوازییێن "نەلۆژیکی و نەدروست" یێن ئەمریکا، گوهۆڕینا بەردەوام یا هەلویستان و لێدوانێن دژی ئێک، بووینە ئەگەرێ هندێ کو دانوستاندن چو پێشڤەچوونان ب خۆڤە نەبینن.

سوپایێ پاسداران دبێژیت: بەردەوامییا وێ چەندێ یا کو ئەمریکا ناڤێ وێ کرییە "دۆرپێچا دەریایی"، ب بنپێکرنەکا رۆهن یا رێککەفتنا ئاگربەستێ دهێتە دانان.

هەروەسا دبێژیت: "ل ژێر رۆناهییا ڤان گەفان دا، چ ئاسۆیێن رۆهن بۆ دانوستاندنەکا بەرهەمدار ناهێنە دیتن."

د پشکەکا دی یا بەیانێ دا هاتییە، ئەو نووچەیێن ژ ئالییێ ئەمریکا ڤە دهێنە بەلاڤکرن، بتنێ "یارییەکا میدیاییە" و د چارچۆڤەیێ "یارییا تۆمەتبارکرنێ" دایە، ب مەبەستا دروستکرنا فشاران ل سەر ئیرانێ.

هەژی گۆتنێ یە، دۆنالد ترەمپ، سەرۆکێ ئەمریکا فەرمان کرییە دۆرپێچا دەریایی بئێخیتە سەر ئیرانێ، ئەڤێ چەندێ ژی وەکرییە تەهران مەرجێ راکرنا دۆرپێچان بۆ ڤەگەریانا سەر مێزا دانوستاندنان دابنیت.

نوکە بتنێ 2 رۆژ بۆ ب دویماهیهاتنا ژڤانێ ئاگربەستا دەمکی ماینە و مەترسییا دەستپێکرنا شەڕی هەیە.