گاڤ

سەرۆکێ ئەمریکا د نویترین پەیاما خۆ دا دەربارەیی شەڕێ وەلاتێ خۆ و ئسرائیلێ ل گەل ئیرانێ راگەهاند: "ئەگەر سەرکردەیێن نوی یێن ئیرانێ (پشتی گوهۆرینا رژێمێ) د زیرەک بن، ئیران دشێت ببیتە خودان پاشەرۆژەکا گەش و مەزن."

ئەڤرۆ دوشەمبییێ 20ێ نیسانا 2026ێ،  دۆنالد ترەمپ، سەرۆکێ ئەمریکا د پۆستەکێ دا ل سەر تۆرا جڤاکی یا (ترووس سۆشیال)، ئەو دەنگۆ رەتکرن کو دبێژن ئسرائیلێ وەلاتێ وی کێشایە ناڤا شەڕێ ئیرانێ و گۆت: "ئسرائیلێ چو جاران د وێ دەربارەیێ دا ل گەل من نەئاخڤتییە."

هەر د درێژاهییا ئاخڤتنێن خۆ دا، سەرۆکێ ئەمریکا ئاماژە ب وێ چەندێ کر کو ئەگەرێ چوونا ئەمریکا بۆ ناڤ شەڕێ ئیرانێ، ئەنجامێن رویدانێن 7ی ئۆکتۆبەرا 2023ێ بوون، هەروەسان ئەو بۆچوونا وی یا دێرین کو دبێژیت: "چو جاران نابیت رێ ب ئیرانێ بهێتە دان ببیتە خودان چەکێ ئەتۆمی."

دەربارەی گۆتگۆتکێن شارەزا و ئەنجامێن راپرسییان ژی، ترەمپی ب "نووچەیێن سەختە" بناڤ کرن و دیار کر کو ئەو ب گۆمانەکا مەزن ڤە تەماشەیی وان دکەت و گۆت: "90%ی ئاخڤتنێن وان درەون و چیرۆکێن درەون، سەختەیی ژی د راپرسییێ دا هاتییە کرن، درست وەک چەوا هەلبژارتنێن سەرۆکاتییێ یێن سالا 2020ێ سەختەیی تێدا هاتبوو کرن."

هەڤدەم دۆنالد ترەمپ، سەرۆکێ ئەمریکا ئەڤرۆ ، بۆ کەنالێ 'پی بی ئێس' دازانین، "ئێکانە تشتێ مە د ڤان دانوستاندنان دا ژ ئیرانێ دڤێت ئەوە کو نابیت وان چەکێ ئەتۆمی هەبیت."

ئەو ژی گۆت: "ئەم دانوستاندنێ ل سەر چو تشتێن دی ناکەین." ئاشکراکر ژی، "ئەگەر ئاگربەست ب دویماهی بهێت، دێ گەلەک بۆمبە دەست ب پەقینێ کەن."