گاڤ

د چارچۆڤێ ئۆپەراسیۆنا "کەربا ئابۆری" (Economic Rage) دا، وەزارەتا گەنجینەیا ئەمریکا گەڕەکا نوی یا سزایان ب سەر تۆرێن ناڤدەولەتی یێن دابینکرنا مۆشەکێن بالستی و فڕۆکەیێن بێفڕۆکەڤان (درۆن) یێن ئیرانێ دا سەپاند، چەندین کەساتی و کۆمپانییان ل ئیران، تورکیا و ئیماراتێ بخۆڤەدگریت.

سێشەمبییێ 21ێ نیسانا 2026ێ، نڤیسینگەها کۆنترۆڵکرنا سەرمایەیێن بیانی ل وەزارەتا گەنجینەیا ئەمریکا، سزا ب سەر 14 کەساتی، کۆمپانییا و فڕۆکەیان دا سەپاندن کو بارەگەهێن وان ل ئیران، تورکیا و ئیماراتێ نە. ئەڤ ئالییە تۆمەتبارن ب وێ یەکێ کو د دابینکرن و ڤەگوهاستنا چەک و کەرەستەیێن سەربازی بۆ ئیرانێ پشکداربووینە.

ل گۆرەیی راگەهاندنا وەزارەتێ، ئەڤ گاڤە د چارچۆڤەیێ ئۆپەراسیۆنا "کەربا ئابۆری" دا دهێت و ئارمانج ژێ نەهێلانا بزاڤێن تەهرانێ یە بۆ ئاڤاکرنا شیانێن بەرهەمئینانا مۆشەکێن بالستی و درۆنێن جۆرێ "شاهید"، کو بۆ هێرشکرنە سەر یا هەڤپەیمانێن ئەمریکا و ژێرخانەیێن ستراتیژی یێن وزەیێ ل دەڤەرێ دهێنە بکارئینان.

سکۆت بێسێنت، وەزیرێ گەنجینەیا ئەمریکا، د ڤی دەربارەیی دا راگەهاند: "دڤێت ئێران بەرپرسیارەتییا تێکدانا بازارێن وزەیێ و ئارمانجکرنا بێسەروبەر یا مەدەنییان هەلدگریت." ئاماژە ب وێ یەکێ ژی کر ل ژێر سەرکرداتییا ترەمپی، وەزارەتا گەنجینە دێ ل سەر دویڤچوونا ژێدەرێن دارایی و سزادانا وان ئالییێن هاریکارییا تەهرانێ دکەن بەردەوام بیت.

تۆرا دابینکرنا پارچەیێن درۆنان

سزایان ب پلەیا ئێکێ کۆمپانییا "پێشگام ئەلکترۆنیک" گرتە، کو دەست ل گەل د دابینکرنا هزاران پارچەیێن ئەلکترۆنی و بزوێنەران بۆ هێزا ئەسمانی یا سوپایێ پاسداران هەیە، کو پاشی د درۆنێن (Shahed-136) دا هاتینە بکارئینان.

کەرتێ مۆشەکی و سۆتەمەنییێ

د پشکەکا دی یا سزایان دا، کۆمپانییەکا تورکی ب ناڤێ "ئیمتی فایبەر" هاتییە سزادان، ژبەر رەوانەکرنا چەندین بارێن ماددەیێن کیمیایی بۆ کۆمپانییا ئێرانییان، کو بۆ باشترکرنا جۆرێ سۆتەمەنییا مۆشەکێن بالستی دهێنە بکارئینان.

هێلێن ئەسمانی و ماهان ئێر

وەزارەتا گەنجینێ تەکەز کر کو هێلا ئەسمانی یا "ماهان ئێر" ل سەر ڤەگوهاستنا سیستمێن فڕۆکەیێن بێفڕۆکەڤان و چەکی بۆ ناڤخۆ و دەرڤەیی ئیرانێ بەردەوامە. د ڤی چارچۆڤەیی دا، کۆمپانییا (سێپێهر کاڤە کیش) و (سامان ئێر سێرڤیسز) هاتنە سزادان، کو د هنارتنا چەکی و درۆنان بۆ وەلاتێ ڤەنزوێلا هاریکاربووینە. هەروەسان دو فڕۆکەیێن بۆینگ 777 ب ناڤێن (EP-MTE) و (EP-MTB) ئێخستنە د لیستا دۆرپێچان دا.

ل گۆرەیی بریارێ، هەمی دارایی و بەرژەوەندییێن ڤان کەس و کۆمپانییان ل ئەمریکا دێ هێنە بلۆک کرن، هەروەسان هەر وەلاتییەک یان بەنکەکا ئەمریکی یان ناڤدەولەتی مامەلەیێ ل گەل بکەت، دێ رویبروی سزایێن گران یێن دارایی و یاسایی بیت.