گاڤ

سەرۆکێ ئەمریکا رادگەهینیت، ئاگربەستا تایبەت ب شەڕێ ئێرانێ ڤە هاتە درێژکرن هەتا وی دەمێ ئالییێ ئیرانی ب مەرجێن وەلاتێ وی رازی دبیت.

ئەڤ درێژکرنا ئاگربەستێ د دەمەکب دا دهێت، بریار بوو سوبەهی سپێدێ دەمژمێر 2:50 ئاگربەستا دو حەفتی یا دناڤبەرا واشنتۆن و تەهرانێ دا ب دویماهی بهێت.

سێشەمبییێ 21ێ نیسانا 2026ێ، دۆناڵد ترەمپ، سەرۆکێ ئەمریکا ل سەر تۆرا جڤاکی یا "ترووس سۆشیار" دەربارەیی ئاگربەستا وەلاتێ خۆ ل گەل ئێرانێ گۆت: "من فەرمان دایە سوپایێ مە کو ل سەر دۆرپێچێ بەردەوام بیت (دۆرپێچا سەر بەندەرێن ئیرانێ) و د هەمی ئالییێن دی دا ژی ب ئامادەباشی و شیانێن تەمام بمینن." هەروەسان دبێژیت: "ئەم دێ ئاگربەستێ درێژ کەین هەتا کو ئەو پێشنیارا خۆ پێشکێش دکەن و دانوستاندن ب دویماهی دهێن."

د پشکەکا دی یا نڤیسینا خۆ دا، سەرۆکێ ئەمریکا دبێژیت: "ل سەر بنەمایێ وێ راستییا کو حکومەتا ئیرانێ یا بوویە پارچە-پارچە، کو ئەڤە تشتەکێ چاڤەرێکری بوو، و ل سەر داخوازا عاسم مونیر (سەرۆکئەرکانێ سوپایێ پاکستانێ) و سەرۆکوەزیران شەهباز شەریف ل پاکستانێ، داخواز ژ مە هاتییە کرن هێرشێن خۆ بۆ سەر وەلاتێ ئێرانێ رابگرین هەتا وی دەمێ سەرکردە و نوینەرێن وان دشێن پێشنیارەکا ئێکگرتی بەرهەڤ بکەن."

ژ ئالییەکێ دی ڤە، ئاژانسا تەسنیم دیارکر، ب فەرمی ئیران پشکداری دانوستاندنێن ئیسلامئابادێ نابیت.

بەری درێژکرنا ئاگربەستێ، دهاتە چاڤەرێکرن دانوستاندن دناڤبەرا شاندێ ئیرانێ و ئەمریکا دا ل پاکستانێ دەستپێبکەنەڤە، لێ هەتا نوکە شاندێ چو ئالییەکی نەگەهشتییە پاکستانێ.