گاڤ

رێکخراوا سەقاناسییا جیهانی ئاشکرا کر، ئەگەرێ زڤرینا دیاردەیا سەقایی "ئێل نینۆ" هەتا ناڤەراستا سالا 2026ێ هەیە، ئەڤ چەندە ژی ب وێ رامانێ یە کو گەرمەکا مەزن و بهێز د رێ دایە.

د راپۆرتەکێ دا رێکخراوێ بەلاڤکرییە، هاتییە دیارکرن پێشبینییێن دویماهییێ ئاماژەیێ ب بلندبوونا بلەز یا پلا گەرمییا رویێ ئاڤا زەریایێ هێمن ددەن. ئەڤە ژی نیشانەکا رۆهنە کو ئەڤ دیاردە دناڤبەرا مەهێن گولان و تیرمەها ئەڤ سالە دا گەشەیێ بکەت.

راپۆرتێ ئاماژە ب وێ چەندێ ژی کرییە، پێشبینی دهێتە کرن دیاردەیا ئێل نینۆ ل ناڤەراستا ئەڤ سالە بزڤریت و ئەڤ چەندە دێ کارتێکرنەکا بەرفرەھ ل سەر شێوازێ سەقایێ جیهانێ کەت. هەروەسان هاتییە گۆتن کو پلا گەرمێ دێ ل پترییا دەڤەرێن جیهانێ ژ ئاستێ نۆرمال بلندتر بیت.

رێکخراوێ رۆهن کر، دیاردەیا ئێل نینۆ ب گشتی پشکدارییێ د گەرمبوونا جیهانێ دا دکەت، ب تایبەتی دەما هەڤدەم دبیت ل گەل گوهۆرینێن سەقایی یێن ژ ئەنجامێ کارێن مرۆڤی پەیدا دبن، ئەڤە ژی ئەگەرێ پێلێن گەرمێ و رویدانێن سەقایی یێن دژوار زێدە دکەت.

راپۆرت گەهشتییە وی ئەنجامی، رەنگە جیهان بەرەڤ گوهۆرینێن مەزن د سەقایی دا بچیت، ئەڤێ چەندێ ژی پێدڤی ب چاڤدێریەکا هویر و بەرهەڤییێن بەروەخت هەیە بۆ رویبرویبوونا گوهۆرینێن سەقایی یێن پاشەرۆژێ.

دیاردەیا ئێل نینۆ چییە؟

 ئەڤە دیاردەیەکا سروشتی یا سەقایە کو هەر "دو بۆ حەفت سالان" جارەکێ رویددەت. ئەڤ چەندە ژبەر گەرمبوونا ئاڤا زەریایێ هێمن چێدبیت و ب گشتی ژ 9 بۆ 12 مەهان بەردەوام دبیت.

ئێل نینۆ پترییا جاران دبیتە ئەگەرێ بلندبوونا پلا گەرمێ ل سەرانسەری جیهانێ و گوهۆرینان د دابەشبوونا بارانبارینێ دا، ب رەنگەکی ل هندەک دەڤەران باران پتر لێ دباریت و ل هندەک دەڤەرێن دی ژی دبیتە ئەگەرێ هشکەسالییێ.