گاڤ

پەیڤدارێ وەزارەتا ئەوقاف و كاروبارێن ئایینی راگەهاند، ل 16ێ گولانێ لیژنەیا دیتنا هەیڤێ ل سعوودیێ دێ رۆژا راوەستیانا حەجییان ل چیایێ عەرەفێ و جەژنا قوربانێ راگەهینیت. هەروەسان ئاماژە ب وێ یەكێ دا كو ل 26 یان 27ێ گولانێ دێ بیتە رۆژا ئێکێ یا جەژنا قوربانی یا پیرۆز.

سالانە ب ملیۆنان موسلمان ل سەرانسەری جیهانێ قەستا مەكەهێ بۆ بجهئینانا فەریزەیا حەجێ دكەن.

سێشەمبییێ 28ێ نیسانا 2026ێ، نەبەز ئیسماعیل، پەیڤدارێ وەزارەتا ئەوقافا هەرێما كوردستانێ راگەهاند: "ئێڤاریا ڕۆژا ٢٩ێ زولقەعدە، لیژنەیا دیتنا هەیڤێ ل سعوودیێ دێ رۆژا ڕاوەستیانێ ل چیایێ عەرەفێ و جەژنا قوربانێ دیار كەت. تنێ سعوودیە وێ رۆژێ دیار دكەت، چونكی رێورەسمێن حەجێ ل وێرێ نە، ئانكو جیهان هەمی چاڤەرێی سعوودیێ یە."

پەیڤدارێ وەزارەتێ گۆت ژی: "9 رۆژان پشتی وێ (دیتنا هەیڤێ) دێ بیتە رۆژا ئێکێ یا جەژنا قوربانی. حاجی ل رۆژا 9ێ زولحیجە، كو رۆژەكێ بەری جەژنێ یە، ل چیایێ عەرەفێ رادوەستن هەتا دەمێ نڤێژا مەغرب،و ڕۆژا پاشتر كو دبیتە 10ێ زولحیجە دێ بیتە رۆژا ئێکێ یا جەژنا قوربانی یا پیرۆز."

ل گۆرەیی گۆتنێن نەبەز ئیسماعیل، ئەگەر ل 16ێ گولانێ هەیڤ ب گرۆڤەیێن تەمام هاتە دیتن، ئەو 9 رۆژان پشتی وی دەمی دێ بیتە جەژن. ئەگەر ل وێ رۆژێ نەهاتە دیتن، ئەو 9 رۆژان پشتی 17ێ گولانێ دێ بیتە رۆژا ئێکێ یا جەژنێ. ب ڤێ یەكێ ژی جەژن دێ كەڤیتە رۆژێن 26 یان 27ێ گولانا 2026.