کوردستان دناڤبەرا رەسەناتی و نویخوازییێ دا
بەلاڤ بکە
مەتین وەرمێلی
هەر جارەکا ل سەر جاددەیێن ڤی باژێرێ جوان"دهۆک"ـێ پەیاسەیان دکەم، یان بەرێ خۆ ددەمە وان وێنەیێن کەڤن یێن دناڤ ئەلبۆمێن مە یێن مالێ دا، ئەز هەست ب هەڤرکییا غەریبیێ دکەم. هەڤرکییەک دناڤبەرا دو جیهانان دا؛ جیهانەکا تژی ژ هەبوونا نفشەکێ ڕەسەن یێ "بەرمال و دیوانخانەیان" و جیهانەکا دی یا نوی کو هەمی یا بوویە دیوارێن شیشەیی و شاشەیێن موبایلان و دیجیتالی.
ڕاستە، ئەم هەمی حەز ژ نوییاتیێ دکەین. ئەرێ کی ژ مە حەز ناکەت د ئاڤاهییەکێ بلند و نوی دا بژیت یان نویترین تەکنەلۆژیایێ بکاربئینیت؟ بەلێ ل ڤێرێ پرسیارەکا جەوهەری دهێتە پێش: ئەرێ نویبوون، ب رامانا وێ یەکێ دهێت کو ئەم پشتا خۆ بدەینە رەسەناتییا خۆ؟
ئەرێ رەسەناتی، بتنێ لبەرکرنا جلکێن کوردی یە ل هەلکەفتێن وەک جەژن و ئاهەنگان. رەسەناتی ئەو "رەوشت و تەبایی و سادەیی" یە یا کو باب و باپیرێن مە پێ دژیان. ئەو "دەرگەهـڤەکرنە"یە، دەما مە پێشوازی پێ ل جیرانێ خۆ دکر بەری مێهڤانان، ئەو "دەستگڤاشتنە" بوو بێی گرتنا چو وێنە و ڤیدیۆیان دا ل سۆشیالێ بهێنە بەلاڤکرن.
لێ حەیف، دیارە ئەم شاش د نویخوازییێ دگەهین. هۆسا دزانین کو "نویبوون" ب رامانا دەستبەردان ژ زمانێ دایکێ، کێمکرنا رێزێ بۆ مەزنێن خۆ یان گوهۆرینا ناڤمالییا مالێ ب مۆدێلێن وەلاتێن دی یە، ب تنێ دا کو بێژنە مە یێ "پێشکەفتی یە". لێ ب راستی نویخوازییا راست و دروست ئەوە مرۆڤ "مێشکێ" خۆ نوی بکەت، زانست و تەکنەلۆژیایێ بۆ خزمەتا کلتوورێ خۆ بکاربئینیت، نە وەک دویڤەلانکان ل دویڤ هەر تشتەکێ بیانی بکەتە غار.
جوانترین دیمەن ئەوە، دەما ئەز گەنجەکی دبینم ب زمانەکێ بیانی دئاخڤیت و گەلەک باش ژ تەکنەلۆژیایێ دزانیت، لێ دلێ وی بۆ سۆپەیێن داران، رەز و بیستان، گر و کانییێن گوندێ وی لێددەت. جوانی د هندێ دا یە ئەم ل تاوەرێن بلند ئاکنجی ببین، لێ رەوشتێ مە یێ بنەجهـ و رەسەن بیت.
بلا کوردستانا مە وەک دارەکێ بیت؛ چەقێن وێ بەر ب ئاسمانی و نویخوازییێ ڤە بچن، لێ رهـ و ریشالێن وێ دناڤ ئەرد و رەسەناتییا ڤێ ئاخێ دا بچنە خوار. چونکی دارا بێ رهـ و ریشال، ب هەمی جوانییا خۆ ڤە، خۆ ل بەر بایەکێ گەلەک کێم ژی ناگریت. بلا ئەم رەسەناتییا خۆ بکەینە د دلێ نویخوازییێ دا.
