گاڤ

یانه‌یا ئامه‌دسپۆر، نوێنه‌را باكوورێ كوردستانێ، پشتی هه‌ڤسه‌نگبوونا وێ دگه‌ل یانه‌یا ئیدر سپۆر ب 3 گۆڵان، بۆ جارا ئێكێ د دیرۆكا خۆ دا گه‌هشته‌ خولا نایاب یا توركیا (سوپه‌ر لیگ)ێ.

پشتی 36 سالان ژ دامه‌زراندنا وێ، ئامه‌دسپۆر بۆ یارییا ئه‌ڤرۆ سه‌ره‌دانا باژارێ ئیدر ل باكوورێ كوردستانێ كر. د حه‌فتییا 38ێ و یا دویماهییێ ژ خولا پله‌ ئێك یا توركیا دا، یاری د ناڤبه‌را ئامه‌دسپۆر و ئیدر سپۆر دا ب 3 گۆڵان بۆ هه‌ردو ئالییان ب دویماهی هات. ب ڤی ئه‌نجامی، ئامه‌دسپۆر خه‌ونا خۆ یا دیرۆكى بجهـ ئینا و گه‌هشته‌ ناڤ رێزا یانه‌یێن نایاب.

ئامه‌دسپۆر و ئیدر سپۆر هه‌ردویان 73 خال هه‌بوون، لێ ژ به‌ر ئه‌نجامێ یارییێن د ناڤبه‌را وان دا (كو ئامه‌دسپۆر یارییه‌ك ب برن و ئێك ب هه‌ڤسه‌نگی ب دویماهی ئینابوو)، یانه‌یا ئامه‌دسپۆر رێزا دیوێ یا خولێ بۆ خۆ مسۆگه‌ر كر.

ئه‌ڤه‌ د ده‌مه‌كێ دایه‌ كو ئامه‌دسپۆر سالا وێ یا ئێكێ بوو د خولا پله‌ ئێك دا یاری دكر، لێ نوكه‌ دێ دگه‌ل یانه‌یێن مه‌زن یێن وه‌ك گالاتاسارای، فه‌نه‌رباخچه‌ و به‌شیكتاش هه‌ڤڕكییێ كه‌ت. ئه‌ڤ سه‌ركه‌ڤتنه‌ دێ ده‌رگه‌هى بۆ ڤه‌كه‌ت ل پاشه‌رۆژێ ببیته‌ ئێك ژ یانه‌یێن ئه‌ورۆپى.

ل سه‌رانسه‌ری باكوورێ كوردستانێ و ب تایبه‌ت ل باژارێ ئامه‌دێ، كورد ب كه‌یفخۆشییه‌كا مه‌زن رژیاینه‌ سه‌ر جادده‌یان و ئاهه‌نگێن سه‌ركه‌فتنا یانه‌یا خۆ و گه‌هشتنا وێ بۆ خولا مه‌زن دگێڕن.