گاڤ

میدیایێن ئیرانێ هوورکارییێن پێشنیازێن تەهرانێ بەلاڤکرن کو بۆ دوماهى ئینان ب شەڕى پێشکێشى ئەمریکا کرینە و سەرۆکێ ئەمریکا ژى نەرازى یە.

ئاژانسا تەسنیم یا ئیرانێ بەلاڤکریە، پێشنیازا ئیرانێ یا دوماهى ئینان ب شەڕى 14 خالى یە و ڤەکێشانا تەماما هێزێن ئەمریکا ژ ناوچێ ب خالا سەرەکى دهێت، پێشنیاز ب رێکا پاکستانێ گەهشتییە واشونتون، دۆنالد ترەمپ، سەرۆکێ ئەمریکا ژى پێشنیاز ب دلى نینن.

داخوازیێن ئیرانێ د ناڤا پێشنیازان دا:

• ڤەکێشانا هێزێن ئەمریکا ژ ناوچەیێن نێزیکى سنۆرێن ئیرانێ.
• دانا گرەنتییێ بۆ هێرشنەکرنا سەر ئیرانێ ل پاشەرۆژێ.
• راکرنا دوورپێچا دەریایى ل سەر بەندەرێن ئیرانێ.
• ئازادکرنا پارەیێن بلۆککرى یێن ئیرانێ.
• کێمکرنا سزایان ل سەر تەهرانێ.
• دانا قەرەبوویا دارایى هەمبەرى زیانێن شەڕى.
• دویماهى ئینان ب میکانزما نوى یا برێڤەبرنا دەرتەنگا هۆرمز.

ل گۆڕەریى ئاژانسا تەسنیم یا فەرمى ئیران چاڤەڕێى بەرسڤا فەرمى یا بەرپرسێن ئەمریکایە ل سەر پێشنیازان.

ژ ئالییێ خۆ ڤە دۆنالد ترەمپ، سەرۆکێ ئەمریکا پشتراستکر کو ئیرانێ پلان و پێشنیازێن نوو بۆ واشونتون هنارتینە، تەرمپى دوپاتکر، ئەو باوەرناکەت وان پێشنیازان قەبوول بکەت ژبەر کو تەهرانێ هێشتا باجا تەمام نەدایە.

ترەمپى ئاشکراکر، هێشتا ئیرانێ باج ل هەمبەرى وان 47 سالێن بۆرى یێن ئیرانێ ب سەرێ جیهانێ ئیناین نەدایە.

چەند دهێت ناکۆکیێن ناڤبەرا ئیران و ئەمریکا دگەهنە دەرگەهێن گرتى زێدەبارى پاکستانێ گەلەک بزاڤکرن ئەو دانوستاندنێن ناڤبەرا تەهران و واشونتون سەر بگرن لێ تا نوکە شکەستن ئینایە و نەگەهشتینە چ خالێن سەرەکى بۆ دوماهى ئینان ب شەڕى.