گاڤ

وەزارەتا بەرگرییا ئیماراتێ راگەهاند، سیستەمێ بەرگرییا ئاسمانی یێ وەلاتێ وێ شیا چار مۆشەکێن "کرۆز" کو ژ ئیرانێ ڤە هاتبوونە ئاراستەکرن، تێکبشکێنیت.

شەڕێ دناڤبەرا ئەمریکا و ئسرائیلێ ل گەل ئیرانێ ل 28ێ شوباتێ یا دەربازبوویی دەستپێکر. ل 8ی نیسانێ ئاگربەستەکا دو حەفتی ب ناڤبەینکارییا پاکستانێ هاتە راگەهاندن کو پاشی دۆنالد ترەمپ، سەرۆکێ ئەمریکا دەمێ وێ درێژ کر، لێ هەتا نوکە چو رێكکەفتنەکا هەردەمی نەهاتییە ئیمزاکرن.

ل گۆرەیی راگەهاندنەکا وەزارەتا بەرگرییا ئیماراتێ، هێزێن وان "ب سەرکەفتیانە" سەرەدەری ل گەل سێ ژ وان مۆشەکان کرییە و ل ئاسمانێ ئاڤێن هەرێمی دا تێکشکاندینە، مۆشەکا چارێ ژی "کەفتیە دناڤ دەریایێ دا بێی کو بگەهیتە ئارمانجا خۆ."

وەزارەتا بەرگرییا ئیماراتێ دبێژیت: ئەو دەنگێن بهێز یێن ل دەڤەرێن جودا-جودا یێن وەلاتی هاتینە بهیستن، "ئەنجامێ تێکشکاندنا سەرکەفتیانە یا وان گەفێن ئاسمانی" بوویە ژ ئالییێ سیستەمێ بەرگرییێ ڤە و پشتراستییێ ژی ددەتە وەلاتییێن وەلاتێ خۆ کو رەوش "د بن کۆنترۆلێ دایە."

وێ وەزارەتا ئیماراتێ داخوازێ ژ وەلاتییێن وەلاتێ خۆ دکەت، پابەند بن ب رێکارێن سلامەتییا گشتی د دەمێ وەرگرتنا هەر نامەیەکا هوشدارییێ یان هەبوونا رەوشەکا نائاسایی.

ئەڤە جارا ئێکێ یە پشتی ئاگربەستێ هێرشەکا ب ڤی رەنگی بچیتە سەر وەلاتێن کەنداڤی. هەتا نوکە ژی ئیرانێ ب فەرمی چو رۆهنکرن ل سەر وێ هێرشا مۆشەکی بەلاڤ نەکرینە.