گاڤ

سەرۆکێ ئەمریکا، هوشدارییەکا توند ددەتە تەهرانێ و رادگەهینیت، هەر هێرشەک بۆ سەر کەشتییێن ئەمریکا د چوارچۆڤەیێ "پرۆژەیێ ئازادییێ" دا، دێ ب وێرانکرنەکا تەمام یا ئیرانێ ب دویماهی هێت.

ئەڤ ئاخفتنێن ترەمپی د دەمەکی دانە ئالۆزییێن دناڤبەرا واشنتۆن و تەهرانێ دا ل دەرتەنگا هورمز گەهشتینە گۆپیتکێ و ئەمریکا ئۆپەراسیۆنا "پرۆژەیێ ئازادییێ" بۆ ڤەکرنا رێرەوێن دەریایی دەستپێکرییە.

دوشەمبییێ 4ێ گولانا 2026ێ، دۆنالد ترەمپ، سەرۆکێ ئەمریکا، د چاڤپێکەفتنەکا تایبەت دا ل گەل کەنالێ (فۆکس نیوز)، گەفێن توند ئاراستەی یکۆمارا ئیسلامی یا ئیرانێ کرن و گۆت: "ئەگەر ئیران هێرشێ بکەتە سەر وان کەشتییێن ئەمریکی یێن کو پرۆژەیێ ئازادییێ بجھ دئینن، دێ ئیران ل سەر رویێ ئەردی هێتە ژێبرن."

ترەمپی ئاماژە ب وێ چەندێ کر کو فشاران کاریگەرییا خۆ هەبوویە و گۆت: "هزر دکەم نوکە ئیران د دانوستاندنێن ئاشتییێ دا گەلەک نەرمتر بوویە."

سەرۆکێ ئەمریکا تەئکید ل سەر وێ چەندێ کر کو پرۆسەیا هنارتنا هێز و کەرەستەیێن سەربازی بۆ دەڤەرێ بەردەوامە و گۆت: "ئەو چەک و تەقەمەنییێن نوکە ل نک مە هەین، ئاست و کوالێتیا وان گەلەک ژ یێن پێشتر بلندترە. مە باشترین کەرەستەیێن سەربازی یێن هەین."

ترەمپی بەحسێ ئامادەباشییا هێزێن وەلاتێ خۆ ل سەر ئاستێ جیهانێ کر و گۆت: "مە ل هەمی جیهانێ بنگەهێن سەربازی یێن هەین و هەمی ب چەک و کەرەستەیێن نوی هاتینە پڕکرن. ئەگەر پێدڤی بکەت، دێ هەمی وان هێز و چەکان بکارئینین و دو دل نابین."