گاڤ

سەرۆکێ هەرێما کوردستانێ و سەرۆکێ پەرلەمانێ ئیراقێ ل بەغدا کۆمبوون؛ هەردو ئالییان تەکەزی ل گرنگییا لێکگەهشتنا دناڤبەرا هێزێن سیاسی و هەماهەنگییا دناڤبەرا هەولێر و بەغدا دا کر بۆ دەربازکرنا ئاستەنگان.

دوشەمبییێ 4ێ گولانا 2026ێ، نێچیرڤان بارزانی، سەرۆکێ هەرێما کوردستانێ هەر د بەردەوامییا دیدارێن خۆ دا ل بەغدا، ل گەل هەیبەت حەلبووسی، سەرۆکێ جڤاتا نوینەرێن ئیراقا فیدرال کۆمبوو.

د کۆمبوونێ دا، ل گۆرەیی راگەهاندنا سەرۆکاتیا هەرێما کوردستانێ، رەوشا سیاسی و یاسایی یێ وەلاتی و رۆلێ سازییا یاسادانانێ د پشتەڤانیکرنا ئارامییێ دا هاتنە گۆتوبێژکرن، "هەردو ئالییان تەکەزی ل گرنگییا لێکگەهشتنا دناڤبەرا هێزێن سیاسی و هەماهەنگییا دناڤبەرا هەولێر و بەغدا دا کر بۆ دەربازکرنا ئاستەنگان، ب رەنگەکی کو خزمەتا بەرژەوەندییا گشتی یا وەلاتی بکەت."

وەک د پشکەکا دی یا راگەهاندنێ دا هاتی، هەردو ئالییان ئێکدەنگ بوون کو پێدڤییە قویناغا بهێت ل سەر بنیاتێ هەڤپشکییا ب دروستی بیت و کارکرن بۆ پەسەندکرنا وان یاسایێن کو رەهەندەکێ نیشتیمانی هەیە و مافێن دەستووری یێن هەمی پێکهاتەیان دپارێزن، د پێشینەیا کارێن پەرلەمان و حکومەتێ دا بیت.

د هەمان دەم دا سەرۆک نێچیرڤان بارزانی و حەلبووسی تەکەزی ل پێدڤییا ئێکخستنا دیدگەهان کرییە بۆ چارەکرنا کێشەیێن هەلاویستی ل سەر بنیاتێ دەستووری و پاراستنا مافێن وەلاتییان.

رەوشا دەڤەرێ و ئەنجامێن وی، تەوەرەکێ دی یێ دیدارێ بوو. تێدا تەکەزی ل پاراستنا ئارامی و جهگێری و بەرژەوەندییێن بلند یێن ئیراقێ و خۆدویرکرن ژ ئالۆزییان هاتەکرن.