گاڤ

حکومەتا هەرێما کوردستانێ راگەهاندنەک بەلاڤکرییە و تێدا ئاماژە دایە، مەسروور بارزانی سەرۆکێ حکومەتا هەرێما کوردستانێ، د پەیوەندییەکا تەلەفۆنی دا ل گەل شێخ عەبدوللا بن زاید ئال نەهیان وەزیرێ دەرڤە یێ ئیماراتێ، رەوشا گشتی یا دەڤەرێ و پێشڤەبرنا پەیوەندییێن هەرێما کوردستانێ و دەولەتا ئیماراتێ گۆتوبێژ کرن.

ئەڤرۆ دوشەمبییێ 4ێ گولانا 2026ێ، ل گۆرەیی راگەهاندنا حکومەتێ، د پەیوەندییێ دا ئاماژە ب وێ چەندێ هاتییە کرن، هەردو ئالییان هێرشێن ڤێ دویماهییێ یێن سەر دەولەتا ئیماراتێ شەرمزار کرن و تەکەزی ل گرنگییا پاراستنا ئاشتی و ئارامی و جهگیرییا دەڤەرێ و ب دویماهیئینانا هێرشان کر.

هەر ئەڤرۆ وەزارەتا بەرگرییا ئیماراتێ د راگەهاندنەکا فەرمی دا ئەشکرا کر، ل رێککەفتی 4یێ گولانا 2026ێ، بەرگرییێن ئاسمانی یێن وەلاتی ب سەرکەفتییانە بەرهنگاری 12 مۆشەکێن بالستی، 3 مۆشەکێن کرۆز و 4 فرۆکەیێن بێفرۆکەڤان (درۆن) بووینە کو ژ ئیرانێ ڤە هاتبوونە ئاراستەکرن.

ل گۆرەیی راگەهاندنێ، ئەڤ هێرشا نوی یا تەهرانێ بوویە ئەگەرێ برینداربوونا 3 کەسان ب برینێن سڤک.