گاڤ
سەرۆکێ هەرێما کوردستانێ و سەرۆکێ جڤاتا بلندا دادوەرى ل ئیراقێ کۆمبوون، دوپاتى ل سەربەخۆییا دەستهەلاتا دادوەرى یا ئیراقێ کرن.

ئەڤرۆ د درێژاهییا دیدارێن خۆ دا نێچیرڤان بارزانى، سەرۆکێ هەرێما کوردستانێ و فایق زێدان، سەرۆکێ جڤاتا بلندا دادوەرى ل ئیراقێ کۆمبوون، د کۆمبوونێ دا رەوشا سیاسى و گشتى یا وەلاتى هاتە بەحسکرن و هەردو ئالییان دوپاتکر،  سەربەخۆییا دەستهەلاتا دادوەرى بنەمایەکێ سەرەکى یە بۆ پاراستنا دەستهەلاتێ و سازییێن وەلاتی و سەقامگێرییێ و مافێن دەستوورى یێن هەموویان.

سەرۆک نێچیرڤان بازرانى رۆلێ سەرۆکێ دەستهەلاتا دادوەرى د پاراستنا سەقامگێریا سیاسى و بەرژەوەندیێن بلند یێن نشتیمانى یێن وەلاتى دا بلند نرخاند و سوپاسییا وى کر بۆ رۆلێ گرنگ د چارەکرنا کێشە و دورستکرنا لێکتێگەهشتنان دناڤبەرا ئالیان دا.

هەر دو ئالییان دوپاتى ل گرنگیییا سەروەرییا یاسایێ و کارکرن د چارچۆڤێ دەستوورى دا کر، وەک تاکە رێک بۆ چارەکرنا کێشەیێن وەلاتى و پاراستنا مافێن یاسایى یێن هەموو پێکهاتان و قەوارەیێ فیدرالى و دەستوورى یێ هەرێما کوردستانێ.

بەردەوامی و گرنگیدان ب هاریکارى و هەماهەنگییا ناڤبەرا دەزگەهـ و سازیێن دادوەرى یێن فیدرالى ل هەرێما کوردستانێ تەوەرەکێ دى یێ کۆمبوونێ بوو.