گاڤ

وەزارەتا بەرگرییا ئیماراتێ دبێژیت: سیستەمێ بەرگرییا ئەسمانی یێ وەلاتی مژویلی بەرهنگاربوونا هێرشێن مۆشەکی و درۆنی یێن ئیرانێ یە کو ئاخا وی وەلاتی دکەنە ئارمانج.

ئەڤ هێرشە د دەمەکی دانە، ئیرانێ رۆژا دوشەمبییێ ژی ب مۆشەکان هێرشی سەر بەندەرێ پەترۆلێ یێ فوجەیرە کربوو و ب وێ ئەگەرێ ئاگرەکێ مەزن ل وێرێ پەیدابوو؛ هەروەسان کۆمپانیا پەترۆلا نیشتیمانی یا ئیماراتێ (ئادنۆک) راگەهاند، ئێک ژ تانکەرێن وان یێن ڤالا ب درۆنەکا ئیرانی هاتییە ئارمانجکرن.

سێشەمبییێ 5ـێ گولانا 2026ێ، وەزارەتا بەرگرییا ئیماراتێ راگەهاندنەکا بلەز بەلاڤکر و تێدا هاتییە: "نوکە بەرگرییێن ئەسمانی یێن ئیماراتێ بەرسڤا وان هێرشێن مۆشەکی و درۆنان ددەن کو ژ ئالییێ ئیرانێ ڤە دهێنە ئاراستەکرن."

دەربارەیی وان دەنگێن بلند یێن ل چەند دەڤەرێن وەلاتی هاتینە بهیستن، وەزارەتا بەرگرییا ئیماراتێ دبێژیت: "ئەو دەنگێن ل دەڤەرێن جودا-جودا یێن وەلاتی دهێنە بهیستن، ژ ئەنجامێ تێکشاندنا مۆشەکێن بالستی، کرۆز و درۆنانە ژ ئالییێ سیستەمێ بەرگرییا ئەسمانی ڤە."

حکومەتا ئیماراتێ داخواز ژ ئاکنجییێن وەلاتی کر کو د هێمن بن و پێگیری رێنمایێن ئەمنی بن.

وەزارەتێ داخواز ژ وەلاتییان کر: "ب چو رەنگان نێزیکی بەرمایکێن وان مۆشەک و درۆنێن هاتینە تێکشاندن نەبن، دەستکاری پارچەیێن کەفتی نەکەن و وێنەیان نەگرن، دا کو ئالییێن پەیوەندیدار بشێن کارێ خۆ یێ پێدڤی بکەن."