گاڤ

جڤاتا وەزیرێن ئیراقێ بهایێ کڕینا گەنمی بۆ وەرزی بهێت دیار کر و پشکا هەرێما کوردستانێ ژی ب 400 هزار تەنێن گەنمی جهگیر کر، کو ژ وی بڕی 292 هزار تەن دناڤ پلانا چاندنێ دانە و 108 هزار تەنێن دی ژی ل دەرڤەیی پلانێ دێ ژ جۆتیارێن هەرێما کوردستانێ هێنە وەرگرتن.

سێشەمبییێ 5ـێ گولانا 2026ێ، محەمەد شیاع سوودانی، سەرۆکوەزیرێ ئیراقێ، سەرپەرشتییا 18ـەمین کۆمبوونا ئاسایی یا جڤاتا وەزیرێن ئیراقێ کر. ل گۆرەیی نڤیسینگەها سەرۆکوەزیران، د کۆمبوونێ دا چەند بڕیارەک د کەرتێن چاندنێ، پەترۆل، بەرگری و ئاکنجیبوونێ دا هاتنە دان.

ل گۆرەیی راگەهاندنا نڤیسینگەها سەرۆکوەزیرێ ئیراقێ، جڤاتا وەزیران بها و پلانا وەرگرتنا گەنمی ب ڤی رەنگی پەسەند کر:

رەزامەندی ل سەر هەموارکرنا نرخێ گەنمی و پلانا وەرگرتنا تۆڤێن (بنەتۆڤ) پلا ئێک بۆ وەرزی چاندنێ یێ 2025-2026 ب ڤی رەنگی نیشان دا:

● 700 هزار دینار بۆ هەر تەنەکی، بۆ وان کەسێن پلانا چاندنێ ژ وان دگریت.

● 500 هزار دینار بۆ هەر تەنەکی، بۆ وان بڕێن دەرڤەیی پلانا چاندنێ نە.

● هژمارکرنا بەرهەمی ب 900 کیلۆگرامان بۆ هەر دۆنەمەکێ بۆ وان زەڤییێن د چوارچۆڤەیێ سیستەمێ ئاڤدێرییێ یێ نوی دا؛ 750 کیلۆگرام بۆ هەر دۆنەمەکێ بۆ زەڤییێن ئاڤی، هەروەسان 300 کیلۆگرام بۆ هەر دۆنەمەکێ بۆ زەڤییێن دێم.

● وەرگرتنا بڕێ 100 هزار تەنێن تۆڤێن پلا بلند، ب بهایێ 700 هزار دیناران بۆ هەر تەنەکی.

● پشکا هەرێما کوردستانێ د پلانا وەرگرتنا گەنمی دا بۆ وەرزێ  چاندنێ (2025-2026)، 400 هزار تەن دێ بن؛ 292 هزار تەن دناڤ پلانێ دانە و 108 هزار تەن ژی دەرڤەیی پلانێ نە.

هەر د وی چارچۆڤەیی دا، جڤاتا وەزیرێن ئیراقێ بریار دا شایستەیێن دارایی یێن جۆتیاران بۆ وەرزێ بۆری (2024-2025) و وەرزێ نوکە (2025-2026) بهێنە خەرجکرن. ئەڤە ژی دێ ب رێیا وێ یەکێ بیت کو وەزارەتا دارایی بڕێ قەرز و سوودێن وان د پرۆژەیاسایا بودجەیا گشتی یا بهێت دا جهگیر بکەت، هەروەسان وەزارەت گەرەنتییا دانا قەران و سوودێن وان بدەتە بانکا بازرگانی یا ئیراقێ (TBI).

جڤاتا وەزیرێن ئیراقێ رەزامەندی ل سەر پێشنیارا جڤاتا وەزاری بۆ کاروبارێن ئابۆری نیشان دا دەربارەیی ڤەکرنا دەرگەهێ هاوردەکرنا هێکان، ب مەرجێ حەوالەیا دەرەکی ب رێیا میکانیزمێ زانیارییێن بەروەخت بیت.

د کۆمبوونێ دا هەموارکرنا پارەیێن تەرخانکری یێن وەزارەتا بەرگرییێ د بودجەیا وەبەرهێنانێ یا سالا 2026 دا هاتە پەسەندکرن.