گاڤ

نێچیرڤان بارزانی، سەرۆکێ هەرێما کوردستانێ و جێگرێ سەرۆکێ پارتی دیموکراتی کوردستان، سەرەدانا خۆ بۆ بەغدا ب "ب بەرهەم و سەرکەڤتی" بناڤ دکەت و ئاماژەیێ ب وێ یەکێ ددەت د کۆمبوونان دا تەکەزی ل سەر کار و هەماهەنگییا هەڤپشک هاتییە کرن.

سپێدەهییا دوهی دوشەمبییێ نێچیرڤان بارزانی، سەرۆکێ هەرێما کوردستانێ و جێگرێ سەرووکێ پارتی دیموکراتی کوردستان ب سەرەدانەکێ گەهشتە بەغدا.

نێچیرڤان بارزانی، سەرۆکێ هەرێما کوردستانێ، ئێڤارییا ئەڤرۆ سێشەمبییێ 5ێ گولانا 2026ێ، ل سەر تۆرا جڤاکی یا ئێکس پەیامەک دەربارەیی سەرەدانا خۆ بۆ بەغدا بەلاڤکر و تێدا دبێژیت: "ئەڤرۆ مە ا سەرەدانەکا ب بەرهەم و سەرکەڤتی بۆ بەغدایا پایتەخت (ئیراقێ) ب دویماهی ئینا کو تێدا مە هەمی هەڤپەیمان، کەساتییێن نشتیمانی و هەڤپشک ل بەغدا دیتن".

سەرۆک نێچیرڤان بارزانی بەحسێ ناڤەرۆکا کۆمبوونێن خۆ د هەیاما ڤان هەردو رۆژان دا دکەت و دبێژیت: "مە تەکەزی ل سەر کار و هەماهەنگییا هەڤپشک کر بۆ رویبرویبوونا ئالنگارییێن نیشتیمانی یێن سیاسی، ئەمنی و ئابۆری، دناڤ وان ژی دا تەکەزی ل سەر کۆنترۆلکرنا چەکی د دەستێ دەولەتێ دا، چارەسەرییا بلەز بۆ رەوشا ئابۆری ژبەر ئەگەرێن رەوشا هەرێمی یا دەڤەرێ؛ هەروەسان مە تەکەزی ل سەر گەرەنتیکرنا ئاسایشا وەلاتێن دەڤەرێ و خۆدویئێخستن ژ هەڤرکییێن هەرێمی کر".

عەلی زەیدی، بەربژارێ چارچۆڤەیێ هەماهەنگییێ یێ شیعەیان بۆ پێکئینانا کابینەیا نوی یا حکومەتا ئیراقێ هاتییە راسپاردن و پشکەک ژ کۆمبوونێن سەرۆکێ هەرێما کوردستانێ ژی دەربارەیی پێکئینانا حکومەتێ بوون. سەرۆک نێچیرڤان بارزانی د وی بیاڤی دا دبێژیت: "مە ل گەل هەڤپشکان گۆتوبێژ ل سەر پێکئینانا حکومەتا نوی یا ئیراقێ کر؛ مە تەکەزی ل پشتەڤانییا خۆ یا تەمام بۆ سەرۆکوەزیرێ راسپاردى کر بۆ کارێ هەڤپشک ژ پێخەمەت ڤەگوهاستنا ئیراقێ و گەلێ وێ بۆ قویناغەکا نوی ژ سەقامگیری، گەشەپێدان و پێشکەفتنێ".

سەرۆک نێچیرڤان بارزانی د دویماهییا پەیاما خۆ دا دبێژیت: "سوپاسییێن خۆ دیار دکەین بۆ گەرمییا پێشوازییێ، سنگفرەهی و گۆتوبێژێن ئاڤاکەر کو د بەرژەوەندییا ئیراقێ دانە".

سەرۆکێ هەرێما کوردستانێ د رۆژا ئێکێ یا سەرەدانا خۆ دا ل گەل سەرکردەیێن چارچۆڤەیێ هەماهەنگییێ؛ محەمەد شیاع سوودانی، سەرۆکوەزیرێ ئیراقێ؛ عەلی فالح زەیدی، بەربژارێ راسپاردى بۆ پێکئینانا کابینەیا نوی یا حکومەتا ئیراقێ؛ عەمار حەکیم، سەرۆکێ رەوتا حیکمە یا نیشتیمانی؛ سەرکردەیێن جڤاتا سیاسی یا نیشتیمانی یا سوننەیان؛ هەیبەت حەلبووسی، سەرۆکێ پەرلەمانێ ئیراقێ و موسەنا سامەرائی، سەرۆکێ هەڤپەیمانییا عەزم کۆمبوو.

ئەڤرۆ ژی سەرۆک نێچیرڤان بارزانی ل گەل پەرلەمانتارێن پێکهاتەیا مەسیحی ل پەرلەمانێ ئیراقێ؛ ئیرفان سدیق، بالیۆزێ بریتانیا ل ئیراقێ؛ قەیس خەزعەلی، ئەمینداری گشتی یێ تەڤگەرا عەسائیبى ئەهلى حەق؛ عەبدولحسێن مووسەوی، سەرووکێ هەڤپەیمانییا (نەهج) یا نیشتیمانی؛ فایەق زێدان، سەرۆکێ جڤاتا بلند یا دادوەری یا ئیراقێ؛ ئەسعەد عیدانی، پارێزگارێ بەسرە و نوینەرێن پێکهاتەیێن ئێزدی، فەیلی و سابیئە مەندائی ل پەرلەمانێ ئیراقێ کۆمبوو.

هەر ئێک ژ فوئاد حسێن، وەزیرێ دەرڤە یێ ئیراقێ و ئەندامێ مەکتەبا سیاسی یا پارتی دیموکراتی کوردستان؛ فەوزی هەریری، سەرۆکێ دیوانا سەرۆکاتییا هەرێما کوردستانێ؛ فەلاح مستەفا، هاریکارێ سەرۆکێ هەرێما کوردستانێ؛ نووری ئۆسمان، بەرپرسێ نڤیسینگەها سەرۆکێ هەرێما کوردستانێ؛ عەبدولحەکیم خەسرۆ، سەرۆکێ فەرمانگەها هەماهەنگی و دویڤچوونێ یا حکومەتا هەرێما کوردستانێ، ل گەل سەرۆک نێچیرڤان بارزانی بوون.