ئادەم رزگار

د ڤی دەمی دا پەیوەندی دناڤبەرا هەولێر و بەغدا دا گەهشتبوونە رێیەکا گرتی، لێ سپێدەهییەکا ڤان دو رۆژێن بۆری سەرۆک نێچیرڤان بارزانی گەهشتە بەغدا و دەرگەهەکێ نوی د پەیوەندییێن ناڤبەرا هەولێر و بەغدایێ دا ڤەکر. هەمی ل بەغدا ل هیڤییا وی بوون، دیدار ب رەنگەکی بوون کو گەلەک بلەز ئیمزا ل سەر کارنامەیا پارتی بۆ کابینا نوی یا حکومەتێ هاتە کرن. ئەڤا ل وێرێ رویدایی هێزا سەرۆک نێچیرڤان بارزانی بوو، کو شیا د هەیاما دو رۆژان دا ل بەغدا هەمی ئەو گازندە و لئێکتێنەگەهشتنا دناڤبەرا هەولێر و بەغدا یێ دا کۆم بوویی، نەهێلیت و چارە بکەت و هەمییان ژی رازی بکەت. دەربارەیی کویراتییا دیداران و چارەسەرییێ، سەرۆکێ نڤیسینگەها سەرۆک نێچیرڤان بارزانی، د. نووری ل رووداو بۆ رایا گشتی یا کوردستانێ ئاشکرا کر، کو "کارنامەیا پارتی ژ ئالییێ چارچۆڤەیێ هەماهەنگییێ ڤە هاتە ئیمزاکرن" ئەڤە ئەو خال بوو کو د سەرەدانا سەرۆک نێچیرڤان بارزانی دا سەرکەفتنا بەروەخت بدەستڤەهاتی.

تشتێ سەرنجا من راکێشایی ئەڤە بوو: دەمێ چوویە نک قەیس خەزعەلی، قەیس خەزعەلی ب کەنی ڤە گۆت سەرۆک پرچا تە سپی بوویە ئەگەر چییە؟ ئەو ژی تنێ گرنژی و چو نەگۆت. قەیس خەزعەلی هەر ب خۆ گۆت ئەڤە نیڤا وێ ل ڤێرە سپی بوویە -مەبەستا وی بەغدا بوو- و نیڤا دی ل هەولێرێ، ئەڤە نیشانا وێ چەندێ بوو کو هەردەم سەرۆک نێچیرڤان بارزانی خەمخۆرێ هەمییانە. گەلەک جاران ئەز گوهـ لێ دبم دبێژن: سەرۆک نێچیرڤان بارزانی یێ ماندییە، ئەز ژی دبێژم ئەو ماندی نابیت، بۆ وەلات و وەلاتییێن کوردستانێ و ئاخا خۆ خەباتێ دکەت. ب رێیا خۆ یا دیپلۆماسی دخوازیت وەلاتییێن هەرێمێ هەردەم دناڤ ئارامی، سەقامگیری و ئاڤەدانی و خوشگۆزەرانییێ دا بن.