ترهمپ: رهنگه حهفتییا بهێت ل گهل ئیرانێ رێكبكهڤین
بەلاڤ بکە
گاڤ
سهرۆكێ ئهمریكا راگههاند، دەلیڤەیەکا گهلهک باش یا ههیی بۆ ب دویماهیئینانا شەڕێ ئیرانێ ب رێیا رێككهفتنهكا نوی، لێ هەشداری دا كو ئهگهر گۆتوبێژ شكهستنێ بئینن، هێزێن ئهمریكا دێ دهست ب بۆمبەبارانکرنا وی وهلاتی كهن.
ئهڤرۆ، دۆنالد ترهمپ ب رێیا هژمارا خۆ یا تایبهت ل تۆرا جڤاكی یا"ترووس سۆشیال" پهیامهک بهلاڤكر و راگههاند، ئهگهر ئیران ب وان مهرجان رازی ببیت یێن ل سهر رێككهفتین، وی دهمی ئۆپهراسیۆنا مە ل دژی دێ ب دویماهی هێت.
چارشهمبییێ 6ێ گولانا 2026ێ، دۆنابد ترهمپ، سهرۆكێ ئهمریكا د چاڤپێكهفتنهكێ دا ل گهل تۆرا "PBS" ئاشكرا كر، واشنتۆن نێزیکی رێككهفتنهکێ یە ل گهل تەهرانێ، دهێته چاڤهرێكرن بهری سهرهدانا وی یا چاڤهرێكری بۆ چینێ ل حهفتییا بهێت بهێته ئیمزاكرن.
ل گۆرەیی گۆتنێن ترهمپی، رێككهفتن مهرجێن گران ب خۆ ڤە دگریت، ژ وان ژی؛ ئیران بهێته نهچاركرن یۆرانیۆمێ خۆ یێ پیتاندی رهوانهیی ئهمریكا بكهت و تەهران پشكهكا مهزن ژ بهرنامەیێ خۆ یێ ئهتۆمی ب تهمامی رابوهستینیت.
ترهمپی گۆت: "بهری نوكه من ههست پێ دكر رێككهفتن نێزیكه، نوكه ژی دێ بینین كا دێ چ رویدهت." لێ هوشداری دا و گۆت: "ئهگهر ئهڤ شهره ب دووماهی نههێت، ئهم ڤهگهرینە بۆمبەبارانکرنا ئیرانێ."
سەرۆکێ ئەمریکا رۆهن ژی كر، ب رێیا بجهئینانا رێككهفتنێ، دۆرپێچا ل سهر دەرتەنگا هورمز دێ هێته ههلگرتن و دەرتەنگ دێ ل هەمبەری ههمی وهلاتان و ههتا ئیرانێ ژی هێته ڤهكرن.
