گاڤ

بڕیارە سوبەهی کاروانێ ئێکێ یێ حەجییێن هەرێما کوردستانێ بۆ بجهئینانا فەریزەیا حەجێ بەرەڤ سعوودیێ بدەتە رێ. وەزارەتا ئەوقافێ ژی رادگەهینیت، هەمی خزمەتگۆزاری ل مەککەهێ هاتینە بەرهەڤکرن و هەتا شێفێن کوردی ژی بۆ بەرەهەڤکرنا خوارنێ هاتینە دابینکرن.

ئەڤسالە 5,120 حەجی دێ ژ هەرێما کوردستانێ فەریزەیا حەجێ بجهـئینن. بۆ ڤەگوهاستن و خزمەتکرنا وان 105 کۆمپانییا هاتینە راسپاردن، هەر کۆمپانییەک بەرپرسیارەتییا 49 حەجییان ب ستوویێ خۆ ڤە دگریت.

چارشەمبییێ 6ێ گولانا 2026ێ، رۆژگار جەعفەر، بەرپرسێ راگەهاندنا پرۆسەیا حەجێ راگەهاند: "سوبەهی ل دەمژمێر 09:30ـێ سپێدێ، ئێکەم کاروانێ حەجییان دێ ب رێیا فرۆکەخانەیا ناڤدەولەتی یا هەولێرێ بەرەڤ سعوودیێ دەتە رێ. لیژنەیێن پێشوازییێ یێن وەزارەتێ ل فرۆکەخانا جەددە جهگیر بووینە دا کو ب کێمترین ماندیبوون حەجییان بەرەڤ جهێ ڤەحەواندنێ وان ل مەککەهێ ڤەگوهێزن".

دەربارەیی رێکارێن ئەمنی یێن سعوودیێ، رۆژگار جەعفەر هوشدارییێ ددەت و دبێژیت: "رێکارێن ئەڤ سالە گەلەک د توندن؛ هەتا داخوازا ناسنامەیێ ژ مە ژی وەک دەستەیا کارگێری دهێتە کرن. تنێ ئەو کەسێن ڤیزەیا فەرمی یان رێپێدانێ هەبیت، دشێن بچنە دناڤ باژێرێ مەککەهێ دا."

ئێک ژ تایبەتمەندییێن حەجا ئەڤ سالە، دابینکرنا خوارنا کوردییە. بەرپرسێ راگەهاندنا پرۆسەیێ داخوازێ ژ حەجییان دکەت "چ جۆرە خوارنێ وەک کادە و خۆرمەیان ل گەل خۆ نەئینن، چونکی باشترین جۆرێ خوارنێ هاتییە دابینکرن و شێف و کابانییێن شارەزا یێن هەرێما کوردستانێ ل مەککەهێ د بەرهەڤن دا کو ژەمێن خوارنێ یێن ب تام و خۆشییا کوردی بەرهەڤ بکەن."

رۆژگار جەعفەر پشتراستیێێ ددەتە کەسوکارێن حەجییان کو هەمی ژمارە تەلەفۆنێن لیژنەیان و کۆمپانییان د ڤەکەرینە و دبێژیت: "ئەم ل ڤێرێ وەک خزمەتکار و ل جهێ کور و کچێن وان ل گەل حەجیاینە و هەر چ تشتێ ژ دەستێ مە بهێت بۆ خزمەتکرنا وان دێ کەین."