گاڤ

فراکسیۆنا پارتی دیموکراتی کوردستان بریار دا ڤەگەریتە ناڤا هۆلا پەرلەمانێ ئیراقێ و دەست ب کار و چالاکییێن خۆ بکەت.

چارشەمبییێ 6ێ گولانا 2026ێ، د راگەهاندنەکێ دا، فراکسیۆنا پارتی ل جڤاتا نوینەرێن ئیراقێ دبێژیت، بریارا وان پشتی دروستبوونا "لێکتێگەهشتنەکا ئەرێنی" دناڤبەرا هێزێن سیاسی دا هاتییە.

ل گۆرەیی راگەهاندنێ، ئەو لێکتێگەهشتنە ب تایبەتی پشتی سەرەدانا سەرۆکوەزیرێ راسپاردی بۆ پێکئینانا حکومەتێ و شاندێ بلند یێ چارچۆڤەیێ هەماهەنگییێ بۆ هەرێما کوردستانێ دروستبوویە؛ هەروەسان سەرەدانا شاندا دانوستانکارا پارتی بۆ بەغدا ب مەبەستا گەهشتن ب چارەسەرییێن رهـ و ریشالی، ئەگەرەکێ دی یێ وێ بریارێ یە.

فراکسیۆنا پارتی ئاماژەیێ ب وێ چەندێ دکەت، ڤەگەریانا وان بۆ ناڤا هۆلا پەرلەمانی ژ ئەنجامێ بەرپرسیارەتییا یاسایی و نشتیمانییە، "دا کو ل ناڤ هۆلا پەرلەمانی ژ نێزیک چاڤدێرییا بجهئینانا وان رێککەفتن و لێکتێگەهشتنان بکەین یێن کو تایبەتن ب دابینکرنا مافێن دەستووری، یاسایی و دارایی."

د پشکەکا دی یا راگەهاندنێ دا، فراکسیۆنا پارتی دوپات دکەت، دێ هەردەم د سەنگەرێ پێشییێ یێ بەرەڤانییێ دا بن بۆ چەسپاندن و بدەستڤەئینانا مافێن رەوا یێن هەمی وەلاتییێن ئیراقێ و د ناڤ دا ژی مافێن رەوا یێن گەلێ کوردستانێ.