گاڤ

یانەیا وەرزشی یا دهۆکێ ب فەرمی راگەهاند، کێشەیا دارایی و گیرۆبوونا مووچەیێن یاریکەران هاتە چارەکرن و بریارە هەر ئەڤ شەڤە یاریکەر ڤەگەرنە سەر راهێنانێن خۆ یێن ئاسایی.

پشتی کو د یارییا بەرانبەر یانەیا نەفت میسان دا، د. عەلی تەتەر، پارێزگارێ دهۆکێ سۆز دابوو یاریکەران کێشەیا مووچەیێن وان چارە بکەت، یانەیا دهۆک ئەڤرۆ راگەهاند، ژ ئەگەرێ لێکتێکنەگەهشتنەکێ دناڤبەرا بەنکی و پشکا دارایی یا یانەیێ دا، خەرجکرنا وی پارەیی هندەک گیرۆ ببوو.

یانەیا دهۆک ئاماژە ب وێ چەندێ ژی کر، نوکە ئەو کۆژمێ پارەیی هاتییە خەرجکرن و چو کێشەیێن دارایی ل بەرسینگێ یاریکەران نەماینە، ژبەر هندێ یاریکەران بریار دا کو هەر ئەڤ شەڤە ڤەگەرنە سەر راهێنانێن خۆ.

ئەڤ چارەسەرییە پشتی وێ چەندێ دهێت کو ل هەیاما دەربازبوویی یاریکەرێن یانەیا دهۆکێ چەندین جاران دلگرانییا خۆ ل هەمبەر پاشکەفتنا مووچەیێن خۆ دیار کربوو. هەروەسان ژبەر نەدانا مافێن وان یێن دارایی، یاریکەران چەندین جاران بایکۆتا راهێنانان کربوو و دویماهی جار ئەڤرۆ بوو؛ بەلێ پشتی چارەکرنا کێشەیێ، بایکۆت هاتە شکاندن و رەوشا یانەیێ ئاسایی بوو ڤە.