گاڤ

کارنامەیا حکومەتا عەلی فالح زەیدی، سەرۆکوەزیرێ راسپاردی یێ ئیراقێ هاتە ئاشکراکرن، کو ئەڤرۆ ب فەرمی رادەستی سەرۆکێ پەرلەمانی هاتە کرن. ئەڤ کارنامەیە ژ 14 تەوەرێن سەرەکی پێکدهێت کو پترییا بیاڤێن ئەمنی، ئابۆری و دیپلۆماسی ب خۆڤە دگریت.

نیڤشکێ تەوەرێن کارنامەیا نوی:

1- ئاسایش و سەروەرییا دەولەتێ: حکومەت دێ کار کەت بۆ کۆمکرنا چەکی تنێ د دەستێ دەولەتێ دا و چەسپاندنا دەسەلاتا یاسایێ. هەروەسان بهێزکرنا حەشدا شەعبی د ناڤ سیستەمێ ئەمنی دا ل دویڤ یاسایێ، پاراستنا سنۆران ب تەکنەلۆژیا سەردەم و پاراستنا ئازادییا رادەربرینێ و مافێن مرۆڤی.

2- سیاسەتا دەرڤە: دویرئێخستنا ئیراقێ ژ هەڤرکییێن هەرێمی و ناڤدەولەتی، بهێزکرنا پەیوەندییان ل گەل وەلاتێن عەرەبی و کەنداڤی و کارکرن ل سەر پرۆژەیێ "رێیا گەشەپێدانێ". هەروەسان بلندکرنا بهایێ پاسپۆرتا ئیراقی و کاراکرنا رێککەفتنا ستراتیژی ل گەل ئەمریکا.

3- ئابۆری و چاکسازییا دارایی: بنیاتدانانا ئابۆرەکی کو کێمتر پشتا خۆ ب پەترۆلێ گرێبدەت، چاکسازی د سیستەمێ بەنکی دا بۆ بەرهەنگاربوونا سپیکرنا پارەیی و دامەزراندنا "سندۆقا نفشان" بۆ پاراستنا سامانی بۆ پاشەرۆژێ. هەروەسان پشتەڤانیکرنا کەرتی تایبەت و رێگریکرن ل قۆرخکارییێ.

4- وزە (کارەبا، پەترۆل و گاز): چاکسازییا گشتی د کارەبێ دا و پشکدارکرنا کەرتی تایبەت د دابەشکرنێ دا. هەروەسان بزاڤکرن بۆ پەسەندکرنا "یاسایا پەترۆل و گازی" و گەهشتن ب خۆبرێڤەبرنێ د بەرهەمێن سۆتەمەنییێ دا.

5- پیشەسازی و چاندن: پشتەڤانیکرنا پیشەسازییێن خوارن و دەمانان و بکارئینانا تەکنەلۆژیایا سەردەم د ئاڤدێرییێ دا، ل گەل گەرەنتیکرنا مافێن ئاڤێ یێن ئیراقێ ژ وەلاتێن جیران.

6- خزمەتگۆزارییێن گشتی و ساخلەمییێ: گوهۆرینا سازییان بۆ سیستەمێ دیجیتالی بۆ کێمکرنا بیرۆکراسییێ، باشترکرنا خزمەتگۆزارییێن ساخلەمییێ و بەرفەرهکرنا "پشتراستییا ساخلەمی". د بیاڤێ پەروەردەیێ دا ژی، ئاڤاکرنا قوتابخانەیێن نوی و هنارتنا قوتابییان بۆ دەرڤەیی وەلاتی.

7- مافێن مرۆڤی و جڤاک: پاراستنا مافێن ژنان و زارۆکان، دەرکرنا یاسایا توندوتیژییا خێزانی و گوهۆرینا وەرگرێن هاریکارییێن جڤاکی بۆ خودانکاران ب رێیا پشتەڤانیکرنا پرۆژەیێن بچویک.

8- تەکنەلۆژیا و وەرزش: دەسپێکرنا مۆلەتا نیشتیمانی بۆ موبایلێ، بهێزکرنا ئاسایشا ئەلیکترۆنی، پشتەڤانیکرنا بژاردەیێن نیشتیمانی و دابینکرنا دەلیڤەیێن کاری بۆ گەنجان.

بنەمایێن بجهئینانێ:

عەلی زەیدی راگەهاند، ئەڤ کارنامەیە وەک پەیمانەکا نیشتمانی یە ل هەمبەر پەرلەمانی و بجهئینانا ڤان خالان هەمی دێ هێتە گرێدان  ب دابینکرنا بودجەیێ پێدڤی د یاسایا بودجەیێ گشتی دا. حکومەت دێ بەرنامەیەکێ هویر بۆ هەمی وەزارەتان و هەرێما کوردستانێ و پارێزگەهان دارێژیت.