گاڤ

دۆنالد ترەمپ، سەرۆكێ ئەمریکا راگەهاند، ئەو هێرشێن تۆلڤەکرنێ یێن ل دژی ئارمانجێن ئیرانی هاتینە کرن پشتى هێرشێن ئیرانێ، ب تنێ وەك "زلەهە‌كا سڤک" دبینیت.

سپێدەهییا ئەڤرۆ ئەینییێ، دۆنالد ترەمپ د داخویانییەکێ دا بۆ تۆرا نووچەیی یا (ABC) یا ئەمریکی ئاماژە ب وێ چەندێ کر، ئەو هێرشێن وەلاتێ وی وەک بەرسڤەک بۆ کرین، ب تنێ "زلەهەکا سڤک" بوون و گۆت ژی: "ئاگربەستا ل گەل ئیرانێ یا بەردەوامە و د وارێ بجهئینانێ دایە."

ئەڤ داخویانییا ترەمپی د دەمەکیدایە کو ئالۆزیێن دناڤبەرا تەهرانێ و واشنتنێ دا گەهشتینە بلندترین ئاست و د چەند دەمژمێرێن بۆری دا دەنگێ چەندین پەقین ل رۆژئاڤایێ تەهرانێ هاتییە بهیستن. هەروەسان سوپایێ پاسدارانێ یێ ئیرانێ راگەهاندییە کو وان هێرش کرییە سەر کەشتییێن شەڕی یێن ئەمریکا ل دەرتەنگا هۆرموز، سێنتکۆمێ ژی راگەهاندییە کو وان بەرسڤا هێرشێن ئیرانێ دایە.

ئاگربەستا دەمکی یا دناڤبەرا هەردو ئالییان دا ل بەر لیڤایێ هەرفینێ یە و دۆنالد ترەمپی پێشتر هایداری دابوو کو ئەگەر ئیران هێرشی کەشتییێن ئەمریکی بکەت، دێ ب توندی بەرسڤا وان دەن.