گاڤ

وەزارەتا پەترۆلێ یا ئیراقێ ئەو تۆمەتێن ئەمریکا رەت کرن یێن کو ب ئەگەرێ وان "عەلی مەعاریج بەهادلی"، ئێک ژ بریکارێن وەزارەتێ ئێخستییە د لیستا سزادایان دا، هەروەسان بەرهەڤییا خۆ بۆ هەر ڤەکۆلینەکا دادوەری ل دۆر وان تۆمەتان نیشان دا.

ئەو سزایێ ل سەر عەلی مەعاریج بەهادلی، بریکارێ وەزارەتا پەترۆلێ بۆ کاروبارێن دابەشکرنێ، رۆژا پێنجشەمبییێ 7ێ گولانێ ژ ئالییێ وەزارەتا گەنجینەیا ئەمریکا ڤە هاتە راگەهاندن، د وێ راگەهاندنێ دا ئەو بەرپرسێ ئیراقی ب وێ چەندێ هاتبوو تۆمەتبارکرن کو "پۆستێ خۆ ب دەلیڤە دیت بیت بۆ ئاسانکارییا قاچاخچییا پەترۆلێ د بەرژەوەندییا ئیرانێ و گرۆپێن چەکدار دا".

وەزارەتا پەترۆلێ یا ئیراقێ د رۆهنکردنەکێ دا، ژبلی رەتکرنا تۆمەتان، ئاماژە ب وێ چەندێ دا کو دێ رێزێ ل رێکارێن یاسایی و دادگەهێن ئیراقێ گریت، داخواز ژی کر کو ل سەر بنەمایێ شەفافیەتێ و بەرپرسیارییێ مامەلە ل گەل هەر دۆسییەکێ بهێتە کرن و تۆمەت ل سەر بنەمایێ بەلگەیان بن، نە ل سەر بنەمایێ شرۆڤەکرنێن دی و وەزارەتێ بەرهەڤییا خۆ بۆ هەر جۆرە هەڤکارییەکێ و ڤەکۆلینەکا دادوەری ل دۆر ڤێ بابەتێ دیار کر.

وەزارەتا پەترۆلێ یا ئیراقێ راگەهاند، پرۆسا هنارتنا پەترۆلا خاڤ، فرۆتن، بارکرن و هەمی رێکارێن گرێدایی ڤێ چەندێ، د سنۆرێ بەرپرسیارییا بریکارێ وەزارەتێ بۆ کاروبارێن دابەشکرنێ دا نینە، بەلکو کۆمپانییا و ئالییێن پەیوەندیدار ب میکانیزمێن تایبەت ڤێ دۆسیەیێ ب رێڤە دبەن. هەروەسان ئاماژە ب وێ چەندێ ژی کر کو پێشتر کۆمپانییا ب بازارکرنا پەترۆلا ئیراقێ (سۆمۆ) ئەو دەنگۆیە رەت کربوون.

بەهادلی ژ ئالیبێ ئەمریکا ڤە ب وێ چەندێ دهێتە تۆمەتبارکرن کو رێ دایە رۆژانە ب بهایێ ملیۆنان دۆلاران پەترۆل ژ کێلگەها "گەیارە" ب تانکەران بۆ کۆمپانییەکێ بهێتە ڤەگوهاستن و پاشی ب بەلگەنامەیێن سەختە ژ "خور زوبێر" وەک پەترۆلا ئیراقێ بۆ بازارێن جیهانێ هاتییە هنارتن.