گاڤ

موقتەدا سەدر مەرجێن خۆ بۆ حكومەتا بهێت دیارکرن و بەرهەڤییا خۆ ژی بۆ هەلوەشاندنا "سەرایا سەلام" نیشان دا. هەروەسان داخوازێ دکەت سەرۆکوەزیرێ بهێت یێ ئیراقێ "نە رۆژهەلاتخواز و نە رۆژئاڤاخواز" بیت.

شڤێدی پێنجشەمبییێ کارنامەیا حکومەتا عەلی فالح زەیدی، سەرۆکوەزیرێ راسپاردی یێ ئیراقێ هاتە ئاشکراکرن ب فەرمی رادەستی سەرۆکێ پەرلەمانی هاتە کرن. کارنامە ژ 14 تەوەرێن سەرەکی پێکدهێت کو پترییا بیاڤێن ئەمنی، ئابۆری و دیپلۆماسی ب خۆڤە دگریت.

موقتەدا سەدر، رێبەرێ رەوتێ نیشتیمانی یێ شیعە، د پەیامەکا نوی دا کۆمەکا مەرجان بۆ سەرۆکوەزیرێ راسپاردی و کابینا بهێت یا ئیراقێ نیشان ددەت. سەدر داخوازا "گوهۆرینێن رهـ و ریشالی" د پێکهاتێ هێزێن چەکدار دا دکەت و مۆلەتا 90 رۆژان ژی بۆ بنبڕکرنا گەندەلییێ دیار دکەت.

سەدر بەرهەڤییا خۆ بۆ هەلوەشاندنا (لیوایا یەومی مەوعود) و رادەستکرنا (سەرایا سەلام) ب فەرماندەییا گشتی یا هێزێن چەکدار دیار دکەت، ب وێ مەرجێ کو تەڤایا گرۆپێن دی یێن چەکدار ژی وەکی وان بهێنە گوهۆرین بۆ پێکهاتەیێن مەدەنی یان مرۆڤی.

دەقێ پەیاما سەدری:

ب ناڤێ خودایێ مەزن ئەگەر رازیبوونا خودێ و رازیبوونا گەلی تە دڤێت، کو ئەڤە رازیبوونا مە ئالییێ سەدری یە، دڤێت ئەو کەسێ هاتییە راسپاردن بۆ سەرۆکاتییا وەزیران، هەر کەسەک بیت، ڤان خالێن خوارێ بجهـ بئینیت:

● ئەوا مە د چەند سالێن بۆری دا جەخت ل سەر کری.. دڤێت حکومەتا داهاتی گرۆپێن چەکدار ب جوداهییا ئاراستەیێن وان ڤە، بگۆڕیت بۆ پێکهاتەیەک ب ناڤێ (سەربازێن رێورەسمێن ئایینی) ل ژێر دەستهەلاتا دەستەیا حەج و عومرەیێ دا.. یان وان بگۆڕیت بۆ پێکهاتەیەکا مرۆیی بۆ فریاگوزاری و هاریکاریێن مرۆیی. هەر کەسەک ژ وان رەت بکەت، دێ ب دەرچوویی ژ یاسایێ هێتە هەژمارتن.. ئەگەر ڤێ چەندێ بکەن، ئەز ئامادەم پێکهاتەیا (لیوای یەومی مەوعود) هەلبوەشینم و (سەرایا سەلام) رادەستی فەرماندەیێ گشتی یێ هێزێن چەکدار بکەم، هەروەکی دڤێت هەمی د زویترین دەم دا ڤێ بکەن.

● پشتگرێنەدان ب (تێکهەلەیا عەتار) د پێکئینانا کابینا وەزاری دا و دویرئێخستنا تەڤایا وان ئالییان یێن بالێن چەکدار هەین، هەروەسان پێکئینانا حکومەتەکێ کو داخوازییێن گەلی بجهـ بئینیت.

● کارکرنا بەردەوام و راستەقینە ژ پێخەمەت سەربخۆییا ئیراقێ ژ هەمی دەستوەردانێن دەرەکی، ب رەنگەکی (نە رۆژهەلاتخواز و نە رۆژئاڤاخواز) بیت.

●کارکرنا دەملدەست بۆ بنبڕکرنا گەندەلییێ د هەیاما 90 رۆژان دا.. ب وی مەرجی کو دەستپێکا وێ ب (مامەلەیا سەدەیی) و تاوانبارێن وێ و هەمی دەرهاڤێژتەیێن وێ بیت.

● بهێزکرنا پەیوەندیبێن دەرەکی د چارچۆڤەیەکی دا کو شانازییێ بدەتە ئیراقێ و یا ڤەکری بیت ل هەمبەر وەلاتێن عەرەبی، ئیسلامی و ناڤدەولەتی، بێ چو دەستێوەردانەک ژ ئالییێ چو ئالییەکی ڤە و دەستدرێژینەکرن بۆ سەر کەسێ، چونکی ئەڤە سەربەرزییە بۆ ئیراقێ و ئایین و مەزهەبی، بگرە بۆ وی گەلی ژی یێ کو ب ئاگرێ شەڕان سۆتی.

● ئەم رازی نابین ب هەبوونا چو تاکەکێ رەوتێ شیعی یێ نیشتیمانی دناڤا کابینەىیا وەزاری دا و چو وەزیرەک ژ وان نوینەراتییا مە ناکەت.