گاڤ

ئەڤرۆ پێشهاتێن نوو ل رۆژئاڤایێ کوردستانێ هەنە، د هەیاما 24 دەمژمێرێن بۆرى دا 232 شەڕڤان هاتنە ئازادکرن و دهێتە چاڤەڕێکرن ئەڤرۆ هزار ئاوارە ڤەگەڕنە عەفرینێ.

د چارچۆڤێ بجهئنانا رێککەفتنا ناڤبەرا هێزێن سووریا دیمۆکرات هەسەدێ و حکومەتا نوو یا سووریا ب سەرۆکایەتییا ئەحمەد شەرع دا گرتى دێ هێنە ئازادکرن و ئاوارە دێ ڤەگەڕنە جهێن خۆ کو ئەڤە دو ژ گرنگترین خالێن رێککەفتنێ بوون.

شڤێى و تا بەرێ سپێدەهییا ئەڤرۆ 232 شەڕڤان کو د زیندانێن حکومەتا نوکە یا سووریا دا بوون هاتنە ئازادکرن و گەهشتنە ناڤا کەس و کارێن خۆ و دهێتە چاڤەڕێکرن یێن دى ژى بهێنە ئازادکرن ل گۆڕەیى گۆتنێن پارێزگارێ حەسەکێ و رێککەفتنا ناڤبەرا حکومەتا سووریا و هەسەدێ دا.

هەر ئەڤرۆ گەڕەکا دى یا ئاوارەیێن عەفرینێ دێ ڤەگەڕیت، پارێزگارێ حەسەکێ ژى دبێژیت: تا ئێک ئاوارە مایە دوورى دەڤەرێن خۆ و تا ئێک شەڕڤان ژى د زیندانان دا مایە ئەو دێ کارى بۆ ڤەگەڕاندنا وان کەن.