گاڤ

وەزیرێ وزەیێ یێ ئەمریکا دبێژیت، ئیدارەیا ترەمپی "بۆ هەمی هزران یا بەرهەڤە" ب مەبەستا کێمکرنا تێچوویێ سۆتەمەنییێ، ژ وان ژی لادانا باجا فیدرالی ل سەر بەنزینێ. ئەڤە ژی پشتی کو ژ ئەگەرێ شەڕێ ئیرانێ بها ب رێژەیا 50% بلند بوویی؛ هەروەسان دبێژیت: ئەگەر دەرتەنگا هورمز ب رێککەفتنێ نەهێتە ڤەکرن، ئەو دێ هێزێ بکارئینن.

روژا 28ێ شوباتا ئەڤ سالە، ئەمریکا و ئسرائیلێ هێرش کرە سەر ئیرانێ و وێ ژی ب هێرشکرنا سەر وەلاتێن جیران و نیشانگرتنا چەند ئارمانجان ل ئسرائیلێ بەرسڤ دا. ل روژا دویێ یا شەری ئیرانێ دەرتەنگا هورمز گرت، ڤێ چەندێ ژی بهایێ بەرمیلەکا پەترۆلێ ژ 72 دۆلاران بۆ سەری 100 دۆلاران بلند کر.

ئێکشەمبییێ 10ێ گولانا 2026ێ، کریس رایت، وەزیرێ وزەیێ یێ ئەمریکا د هەڤپەیڤینەکێ دا ل گەل کەنالێ NBC راگەهاند، ئیدارەیا وان پشتەڤانییێ ل هەر گاڤەکێ دکەت کو ببیتە ئەگەرێ کێمکرنا بهایان بۆ ئەمریکییان. رایت گۆت: "ئەم بۆ هەمی هزران د بەرهەڤین"، ئەڤە ژی وەک ئاماژەیەک بۆ پێشنیارا لادانا 18 سەنتێن باجا فیدرالی ل سەر هەر گالۆنەکا بەنزینێ.

ل گۆرەیی داتایێن (یانەیا ئۆتۆمبێلا ئەمریکی)، تێکرایێ بهایێ گالۆنەکا بەنزینێ ل ئەمریکا رۆژا ئێکشەمبیێ 4.52 دۆلار بوون، ئەڤە بلندبوونەکا پیڤانەییە ژ وی دەمی وەرە کو شەڕێ ئیرانێ ل 28ێ شوباتێ دەستپێکری.

وەزیرێ وزەیێ بەرهەڤ نەبوو پێشبینیا هندێ بکەت کا دێ بها ئاستەنگا پێنج دۆلاران شکێنیت یان نە، بەلێ ئاماژە ب وێ چەندێ کر کو ئارمانجا وان یا سەرەکی بتنێ بها نینە، بەلکو ب دویماهیئینانا هەڤرکییەکا دەمدرێژە. رایت دبێژیت: "ئەوا ئەم دکەین، ب دویماهیئینانا هەڤرکییەکا 47 سالییە کو ئیرانێ هەلکرییە، کو تێدا بۆ هەیاما 47 سالانە درویشمێ 'مرن بۆ ئەمریکا و مرن بۆ ئسرائیلێ' بلند دکەن."

کریس رایت دیار ژی کر، کو ئەمریکا د پێگەهەکێ گەلەک یێ بهێز دایە ژ ئالییێ بەرهەمئینانا پەترۆل و گازی سروشتی ڤە و ڤێ چەندێ وەک کارتەکا بهێز دژی تەهرانێ بکاردئینیت.

دەربارەیی رەوشا دەىرتەنگا هورمز و "پروژەیێ ئازادییێ" بۆ پاراستنا کەشتییان، وەزیرێ وزەیێ یێ ئەمریکا هوشدارییەکا توند دا تەهرانێ و راگەهاند: "ئەگەر د چەند روژێن بهێت دا دیاربوو کو چو رێکێن گونجایی بۆ رێککەفتنەکا ب رێیا دانوستاندنان نینن، ئەم دێ ڤەگەرینە سەر رێیا سەربازی بۆ ڤەکرنا دەرتەنگێ."

رایت دبێژیت: فشارێن ئابۆری ل سەر ئیرانێ ب رەنگەکێ بلەز زێدەبووینە، ئەو ژی ژبەر دۆرپێچا دەریایی یا ئەمریکا ل سەر بەندەرێن ئیرانێ کو وەکرییە تەهران ژ داهاتێ پەترۆلێ بێبەهر ببیت.