گاڤ

ل گۆرەیی ڤەکۆلینەکا نوی یا زانکۆیا مۆدێنا و ریجیۆ ئیمیلییا ل ئیتالیا، ئەو کەسێن ب رێکا رێژیمێ (دایت) کێشا خۆ کێم دکەن و دخوازن کێشا وان یا جهگیر بمینیت و جارەکا دی قەلەو نەبن، پێدڤییە رۆژانە نێزیکی 8 هزار و 500 گاڤان ب پێیان بچن.

شارەزایان دیار کریە کو بەردەوام برێڤەچوون ب شێوەیەکێ رۆژانە ئەگەرەکێ گەلەک گرنگە بۆ رێگریکرنێ ل قەلەوبوونێ، ب تایبەتی دەمێ هەڤبەری دناڤبەرا وان کەسان دا هاتییە کرن یێن د هەمان دەم دا رێژیم و وەرزش کرین، ل گەل وان کەسێن کو بتنێ رێژیم کری و وەرزش نەکری.

ئەڤ ڤەکۆلینە ل (کۆنگرەیێ ئەورۆپی بۆ قەلەوبوونێ) ل باژێرێ ئیستەنبۆلێ هاتە نیشاندان.

پرۆفیسۆر مەروان ئەلغۆش ژ زانکۆیا مۆدێنا و ریجیۆ ئیمیلییا ل ئیتالیا، کو سەرپەرشتییا ڤەکۆلینێ کرییە دبێژیت: "نێزیکی 80% ژ وان کەسێن کێشا وان یا زێدە یان قەلەوی هەیی و ل دەستپێکێ کێشا خۆ کێم دکەن، د هەیاما سێ هەتا پێنج سالان دا، پشکەک یان هەمی ئەو کێشا کێم کری، بۆ وان دزڤریتەڤە،"ئانکو جارەکا دی قەلەو دبنەڤە.

د ڤەکۆلینێ دا دیاربوویە، ئەو کەسێن بەرنامەیەکێ باش یێ ساخلەمییێ بکارئینایی و گاڤێن خۆ یێن رۆژانە بۆ نێزیکی 8 هزار و 450 پێنگاڤان زێدەکرین، شیاینە کێشا خۆ ب جهگیری بهێلن و ب تێکرا نێزیکی 4 کیلۆگرامێن دی ژی کێم بکەن. بەلێ ئەو کەسێن ژمارەیا گاڤێن خۆ زێدە نەکرین، نەشیان کێشا خۆ کێم بکەن یان ب جهگیری بهێلن.

پرۆفیسۆر زێدەتر دبێژیت: "پالدانا خەلکی بۆ هندێ کو رۆژانە گاڤێن خۆ بۆ 8 هزار و 500 گاڤان زێدە بکەن، رێکەکا گەلەک سادە و ب ساناهییە بۆ رێگریکرنێ ل قەلەوبوونێ و زڤڕینا کێشا زێدە."