گاڤ

دۆنالد ترەمپ، سەرۆکێ ئەمریکا راگەهاند، بەرسڤا تەهرانێ بۆ پێشنیارا واشنتۆنێ ب مەبەستا ب دویماهیئینانا شەری، ب دلێ وی نینە و ب "هەمی ڤە یا قەبوینەلکری" وەسف کر.

ترەمپی ل سەر هژمارا خۆ یا فەرمی ل تورا جڤاکی یا (ترووس سۆشیال) نڤیسییە: "نوکە من بەرسڤا وان کەسان خواند ئەوێن بناڤ 'نوینەرێن' ئیرانێ نە. ب دلێ من نینە و ب هەمی ڤە یا قەبویلنەکری یە." سەرۆکێ ئەمریکا ل دویماهییا پەیاما خۆ بتنێ نڤیسییە: "سوپاس بۆ سەرنجدانا هەوە بۆ ڤی بابەتی،" بێی کو ئاماژەیێ ب گاڤێن بهێت یێن وەلاتێ خۆ بکەت یان بێژیت کا دێ دەرگەهێ دانوستاندنان گریت یان نە.

ئەڤ هەلویستێ توند یێ ترەمپی پشتی چەند دەمژمێرەکان دهێت ژ وێ چەندێ کو تەهرانێ ب رێیا ناڤنەینکارێن پاکستانی بەرسڤا چەند لاپەرەیی بۆ پێشنیارا 14 خالی یا ئەمریکا هنارتی. ل گۆرەیی زانیارییان، ئیرانێ د بەرسڤا خۆ دا داخوازا گەرەنتییێن توند کرییە و چەندین مەرج بۆ پاشڤەچوونێ د دۆسیەیێن ئەتۆمی و ڤەکرنا دەرتەنگا هورمز دا دانیانە، کو دیارە ل ەل هێلێن سۆر یێن واشنتۆنێ ناگونجن.

رۆژنامەیا (وۆل ستریت جۆرنال) یا ئەمریکی ل سەر زارێ چەند ژێدەرێن ئاگەهدار بەلاڤکرییە، بەرسڤا ئیرانێ داخوازێن ئەمریکا ل سەر یۆرانیۆما پیتاندی بجھ نەئیناینە. ل شوینا وێ، ئیرانێ پێشنیار کرییە شەر بهێتە راگرتن و ب شێوەیەکێ قویناغ ب قویناغ دەرتەنگا هورمز ل بەرانبەر کەشتییێن بازرگانی بهێتە ڤەکرن و ل بەرانبەر دا ئەمریکا ژی دۆرپێچا ل سەر بەندەر و کەشتییێن ئیرانی لابدەت.

ل گۆرەیی راپۆرتا رۆژنامەیێ، تەهرانێ پێشنیار کرییە دۆسیەیێن ئەتۆمی د هەیاما 30 رۆژێن بهێت دا دانوستاندن ل سەر بهێتە کرن. هەروەسان ئیرانێ بەرهەڤییا خۆ نیشاندایە پشکەک ژ یۆرانیۆمێ زێدە پیتاندی رۆهن بکەت (Dilute) و پشکا دی ژی بۆ وەلاتەکێ سێیێ ڤەگوهێزیت؛ بەلێ ب وی مەرجی کو گەرەنتی بهێتە دان، ئەگەر دانوستاندن شکەستنێ بخۆن یان ئەمریکا ژ رێککەفتنێ بکشێیت، یۆرانیۆم بۆ تەهرانێ بهێتە زڤراندن.

جۆرنال ئاماژە ب وێ چەندێ ژی کرییە، ئیران رازی بوویە پیتاندنا یۆرانیۆمێ رابگریت، بەلێ بۆ هەیامەکێ کێمتر ژ وان 20 سالێن کو ئەمریکا داخواز دکەت. هەڤدەم تەهرانێ ب توندی داخوازا هەلوەشاندنا سازییێن ئەتۆمی رەتکرییە.

ل بەرانبەر دا، ئاژانسا (تەسنیم) یا ئیرانی ل سەر زارێ ژێدەرەکێ ئاگەهدار بەلاڤکرییە، ئەو هویرکاتییێن رۆژنامەیا (وۆل ستریت جۆرنال) بەلاڤکرین، د چەندین پشکێن گرنگ دا "نەراستن." وی ژێدەری دوپاتکرییە کو زانیارییێن رۆژنامەیا ئەمریکی دەربارەیی ماددەیێن ئەتۆمی و ڤەگوهاستنا وان بۆ دەرڤەیی وەلاتی، نە راستن.