گاڤ

میدیایێن ئسرائیلێ ژڤانێ دەستپێکرنا هێرشا مەزن یا ئەمریکا ل سەر ئیرانێ ئاشکراکر، ئەگەر دانوستاندن سەرنەگرتن.

سەرۆک ئەرکانێ سۆپایێ ئسرائیلێ ئایال زامیر گۆت: سۆپایێ مە یێ د ئامادەباشییێ دا و بۆ هەر هێرشەکێ دبەرهەڤن.

میدیایێن ئسرائیلی راگەهاند: دانوستاندنان ب چ رەنگان ئیران و ئەمریکا نێزیکی هەڤدوو نەکرن، هەردەما ئەو دانوستاندن هەرفین، ئەمریکا دێ بریارا هێرشێ دەت. دۆنالد ترەمپ، سەرۆکێ ئەمریکا ل ڤێ حەفتییێ گەلەک یێ مژویلە و کۆمبوونا ل گەل سەرۆکێ چینێ هەیە.

پشتی کۆمبوونێ و بەری دەستپێکرنا مۆندیالێ دێ فەرمانا هێرشێ دەت. ئسرائیل ژی دێ پشکداری هێرشێ بیت.

هێرشا ڤێ جارێ دێ یا کورت و بهێز بیت و سەرکردەیێن ئیرانێ نەچار کەت بهێنە سەر مێزا دانوستاندنان.

بریارە مۆندیال ل رۆژا 11ێ هەیڤا بهێت دەستپێبکەت و تا رۆژا 19ێ هەیڤا تیرمەهێ دێ یا بەردەوام بیت.

دوهی ب فەرمی پێشنیازا نوی یا ئیرانێ بۆ رێککەفتنا ئاشتییێ ب رێکا پاکستانێ گەهشتە کۆچکا سپی، ترەمپی هەر زوی بەرسڤا وان دا و راگەهاند کو ب چ رەنگان ئەو پێشنیازە ناهێتە قەبویلکرن.