گاڤ

کاروان ستوونی، پەیڤدارێ فەرمی یێ حەج و عومرەیێ ل کوردستانێ راگەهاند، هەتا نوکە پتر ژ هزار حەجییێن کوردستانێ ب سلامەتی و بێی چو کێشە گەهشتینە باژێرێ مەککەها پیرۆز و دەست ب کرنا ئەرکێن خۆ یێن ئایینی کرییە.

ئەڤ سالە 5,120 حەجی دێ ژ هەرێما کوردستانێ فەریزەیا حەجێ بجهـئینن. بۆ ڤەگوهاستن و خزمەتکرنا وان 105 کۆمپانییا هاتینە راسپاردن، هەر کۆمپانییەک بەرپرسیارەتییا 49 حەجییان ب ستوویێ خۆ ڤە دگریت.

دوشەمبییێ 11ێ گولانێ 2026ێ، پەیڤدارێ حەج و عومرەیێ ئاماژە ب وێ یەکێ ژی کر کو ئەڤرۆ ئێکەم کاروانێ حەجییێن باژێرێ

سلێمانییێ ل دەمژمێر 5ـی ئێڤاری بەرەڤ عەرەبستانا سعوودیێ ب ڕێ کەڤت، کو ژمارا وان 147 کەسن. ب ڤێ یەکێ ژمارا گشتی یا حەجییێن کوردستانێ یێن هەتا ئەڤرۆ دگەهنە سعوودیێ دگەهیتە 1,176 کەسان.

کاروان ستوونی ب وێ یەکێ ژی کر، ل سەر ڕاسپاردەیا مەسروور بارزانی، سەرۆکوەزیرێ هەرێما کوردستانێ و د. پشتیوان سادق، وەزیرێ ئەوقاف و کاروبارێن ئایینی؛ ئەڤ سالە هەمی حەجییێن کوردستانێ ب ڕێیا فرۆکەیێ گەشتێ دکەن. ل فرۆکەخانەیێ ژی هەمی ئاسانکاری بۆ حەجییان هاتینە کرن، ب تایبەتی د بابەتێ وەرگرتنا چانتەیان دا، ب رەنگەکی کو چانتەیێ حاجی ل مال ژێ دهێتە وەرگرتن و دچیتە بەر دەرگەهێ ژوورا وی ل مەککەها پیرۆز، بێی کو حاجی ل دویڤ بگەریێت.

ل گۆرەیی گۆتنێن ستوونی، رۆژانە تیمێن ساخلەمییێ دناڤ حەجییان دانە بۆ چاڤدێرییا رەوشا وان یا ساخلەمییێ. دەربارەیی خوارنێ ژی، رۆژانە سێ ژەمێن خوارنێ ب دەستێ شێفێن کوردستانی ل 22 بۆفەیێن ڤەکری پێشکێشی حەجییان دهێنە کرن.

د دویماهییا ئاخفتنا خۆ دا، کاروان ستوونی پشتراستی دا وان وەلاتییێن کو ناڤێن وان بۆ حەجا ئەڤ سالە دەرکەفتین، خشتەیێ گەشتان وەک خۆ و بێی چو کێشە دێ بەردەوام بیت و بریارە ل رۆژا 17-5-2026 دویماهی کاروانێ حەجییێن کوردستانێ بگەهیتە عەرەبستانا سعوودیێ.