گاڤ

قایمقامێ قەزا ئاکرێ راگەهاند، رەزامەندی بۆ دابەشکرنا 1033 پارچەزەڤییان هاتییە دان و دێ ل 21ێ گولانێ هێنە دابەشکرن.

دوشەمبییێ 11ێ گولانا 2026ێ، دلاوەر بۆزۆ، قایمقامێ ئاکرێ د کۆنفرانسەکێ رۆژنامەڤانی دا کو پەیامنێرێ گاڤ یێ بەرهەڤبوو راگەهاند: "د قویناغا ئێکێ دا مە 1059 پارچەزەڤی دابەش کربوون؛ هەڤدەم رەزامەندی ل سەر 1033 پارچەزەڤییێن دی ژی هاتییە دان."

ل گۆرەیی گۆتنێن قایمقامێ ئاکرێ، ئەو 1033 پارچەزەڤییێن رەزامەندی ل سەر هاتییە دان، دێ ل رۆژا ل 21ێ گولانێ هێنە دابەشکرن.

قایمقامێ ئاکرێ ئاماژە ب وێ یەکێ ژی کر: "1450 پارچەزەڤییێن دی د بەرهەڤن، ئەڤە بۆ وان فەرمانبەرانە یێن کو ناڤێن وان دەرکەفتین. هەروەسان رەزامەندی بۆ 6427 پارچەیێن دی ژی هاتییە دان."

ل سنۆرێ پارێزگەها دهۆکێ، 86 هزار پارچەزەڤی هاتینە دیارکرن دا کو ل سەر فەرمانبەران بهێنە دابەشکرن. قایمقامێ ئاکرێ دبێژیت: "مە باشترین جهـ بۆ فەرمانبەران دیار کرینە."

دەربارەیی ناحیەیێن گردەسێن و بجیلێ، قایمقامێ ئاکرێ رۆهن کر: "بۆ ناحییا گردەسێن رەزامەندی ل سەر سێ هزار و 720 پارچەزەڤییان هاتییە دان. هەڤدەم بۆ ناحیا بجیلێ ژی رەزامەندی بۆ هزار و 700 پارچەیان هەیە و داخواز هاتییە کرن سنۆر بهێتە بەرفەرهکرن."

دەربارەیی ناحیا دینارتێ، دلاوەر بۆزۆ گۆت: "بۆ دو هزار و 95 پارچەزەڤییان رەزامەندییا دابەشکرنێ دەرکەفتییە."

قایمقامێ ئاکرێ ئاماژە ب وێ یەکێ ژی کر، ئەو چاڤەرێی ب دویماهیهاتنا نڤیسارێن مفاداربوونا فەرمانبەرانە و هەر دەما ب دویماهی هات، دێ دەست ب دابەشکرنا زەڤییان هێتە کرن.